الیکشن میں وسیع پیمانے پر عوام کی آزادانہ شرکت دیکھنا چاہتے ہیں، امریکا

امریکا نے کہا ہے کہ الیکشن میں وسیع پیمانے پر عوام کی آزادانہ شرکت دیکھنا چاہتے ہیں، پاکستان میں انتخابی عمل کی نگرانی کر رہے ہیں۔ 

واشنگٹن میں امریکی محکمہ خارجہ کے نائب ترجمان ویدانت پٹیل نے پریس بریفنگ میں کہا کہ پاکستان کی عوام کو انتخابات میں خوف اور تشدد کے بغیر اپنے سیاسی مستقبل کر فیصلہ کرنا چاہیے۔پاکستان میں پر تشدد واقعات اور میڈیا پر عائد پابندیوں پر تشویش ہے۔چاہتے ہیں اس عمل میں اظہار رائے کی آزادی کا احترام ہو۔

ویدانت پٹیل نے مزید کہا کہ امریکا پاکستان کے انتخابی عمل کو کلوز مانیٹرنگ کر رہا ہے، پاکستان میں انٹرنیٹ کی بندش اور آزادی اظہار رائے میں رکاوٹوں کو بھی دیکھ رہے ہیں۔

نائب ترجمان امریکی محکمہ خارجہ کا کہنا تھا کہ ہم پاکستان کے انتخابی عمل پر گہری نظر رکھے ہوئے ہیں، اور یہ دیکھنا چاہتے ہیں کہ یہ عمل اس طرح سے ہو جس میں اظہار رائے، اجتماع اور انجمنوں کی آزادی کے احترام کے ساتھ وسیع تر شرکت کی سہولت ہو۔ ہمیں تشدد کے تمام واقعات اور میڈیا کی آزادی پر پابندیوں پر تشویش ہے۔

انہوں نے کہا کہ  پاکستانی بلا خوف و خطر آزادانہ اور منصفانہ انتخابات کے ذریعے اپنے مستقبل کے رہنماؤں کا انتخاب کرنے کا بنیادی حق استعمال کرنے کے حقدار ہیں اور بالآخر یہ پاکستان کے عوام پر منحصر ہے کہ وہ اپنے سیاسی مستقبل کا فیصلہ کریں۔

واضح رہے کہ ملک میں 8 فروری کو عام انتخابات شیڈول ہیں تاہم آج انتخابی مہم کا آخری روز ہے۔