لاہور ہائیکورٹ نے 9 مئی کے مقدمات کے جیل ٹرائل کے خلاف درخواستیں ناقابل سماعت قرار دے کر مسترد کر دیں

لاہور: لاہور ہائی کورٹ نے 9 مئی کو آتشزدگی کے مقدمات کے جیل ٹرائل کے خلاف درخواست ناقابل سماعت قرار دے کر خارج کر دی۔

تفصیلات کے مطابق لاہور ہائیکورٹ کے جسٹس علی باقر نجفی کی سربراہی میں 2 رکنی بنچ نے 9 مئی کو آتشزنی کیس کے جیل ٹرائل کے خلاف درخواست کی سماعت کی۔

درخواست میں موقف اپنایا گیا کہ ہائی کورٹ کے رولز کی روشنی میں جیل ٹرائل کا نوٹیفکیشن جاری نہیں کیا گیا جب کہ جیل ٹرائل صاف اور شفاف نہیں ہو سکتا۔

جسٹس علی باقر نجفی نے قرار دیا کہ جیل ٹرائل کا نوٹیفکیشن قانون کے مطابق جاری کیا گیا ہے، جیل ٹرائل میں کچھ غیر قانونی ہے تو ثابت کیا جائے۔

عدالت نے درخواست ناقابل سماعت قرار دے کر خارج کر دی۔