والٹن ائیرپورٹ کی بندش، فلائنگ کلبز کا ائیرپورٹ خالی کرنے سے انکار

تفصیلات کے مطابق   والٹن ائیرپورٹ کی بندش کے معاملے پر  فلائنگ کلبز اور سول ایوی ایشن میں تنازعہ کھڑا ہوگیا ہے۔ فلائنگ کلبز نے ائیرپورٹ خالی کرنے سے انکار کردیا ہے۔سول ایوی ایشن اتھارٹی (سی اے اے)  نے پچیس مئی سے والٹن ائیرپورٹ کو ہمیشہ کیلئے بند کرنے کے احکامات دئیے تھے۔

سی اے اے نے فلائنگ کلبز کو اپنے تمام طیارے فیصل آباد یا کسی اور ائیرپورٹ منتقل کرنے کا حکم دیا تھا۔

ذرائع کے مطابق  فلائنگ کلبز نے مریدکے کے علاوہ کسی ائیرپورٹ پر طیارے لیجانے سے انکار کیا ہے ۔ والٹن ائیرپورٹ پر اس وقت پچاس سے زائد طیارے کھڑے ہیں ۔

فلائنگ کلب مالکان کا کہنا ہے کہ  فیصل آباد یا کسی اور ائیرپورٹ پر طیاروں کیلئے نہ مناسب ہینگر ہیں نہ طلبا وہاں جائیں گے ۔ والٹن ائیرپورٹ کے پانچ فلائنگ کلب میں دو سو سے زائد سٹوڈنٹ پائلٹ زیر تربیت ہیں ۔

ذرائع کے مطابق  والٹن ائیرپورٹ کو ختم کرنے کیلئے فلائنگ کلبز نے لاہور ہائیکورٹ میں کیس بھی دائر کردیا ہے۔

گزشتہ روز لاہور کا تاریخی والٹن ائیرپورٹ ہمیشہ کیلئے بند کردیا گیا تھا۔سول ایوی ایشن اتھارٹی نے حکم جاری کیا تھا۔ائیرپورٹ پرفلائنگ کلبز کو تمام طیارے گراونڈ کرنے کی ہدایت کی گئی تھی۔

ائیرپورٹ مینجر نے احکامات جاری کرتے ہوئے کہا تھا کہ آج آخری پروازیں اڑالیں کل سےائیر پورٹ استعمال نہیں ہوگا۔