پی ٹی آئی کا آئی ایم ایف کو خط لکھنا ملک کے خلاف سازش ہے ، عطا تارڑ

لیگی رہنما  عطااللہ تارڑ نے پی ٹی آئی کی جانب سے آئی ایم ایف کو خط لکھنے کے موقف پر  کہا کہ خط لکھنے کا مقصد بیرونی مداخلت کو شامل کرنا ہے۔

میڈیا سے بات کرتے ہوئے لیگی  رہنما عطا اللہ  تارڑ نے کہا کہ ایک قیدی کیسے آئی ایم ایف کو خط لکھ سکتا ہے لہذا ان کے مذموم مقاصد کے خلاف قانونی کارروائی ہونی چاہیے کیوں کہ انہوں نے پہلے بھی آئی ایم ایف کو خط لکھنے کی کوشش کی۔

انہوں نے کہا کہ ان لوگوں کو چند سیٹیوں پر کامیابی ملی، یہ ملک میں انتشار چاہتے ہیں، ملک میں انتشار کی اجازت نہیں دی جائےگی، ہم نے ملک کی معیشت بہتر کرنی ہے اور  بے روزگاری ختم کرنی ہے۔

عطا تارڑ کا کہنا تھا کہ پی ٹی آئی کو خیبر پختونخوا اور بلوچستان میں جو سیٹیں ملیں کیا وہاں دھاندلی نہیں ہوئی، ملک کی معیشت کو  نقصان  پہنچانے کی کوشش کی جا رہی ہے، یہ لوگ ملک  میں جمہوریت کو ڈی ریل کرنا چاہتے ہیں۔

یاد رہے کہ اس سے قبل پی ٹی آئی رہنما بیرسٹر علی ظفر کا کہنا تھا کہ بانی پی ٹی آئی الیکشن میں ہونے والی دھاندلی کے معاملے پر آئی ایم ایف کو خط لکھیں گے جس میں کہا جائے گا کہ جتنے حلقوں میں دھاندلی ہوئی وہاں آڈٹ کرایا جائے۔