غزہ: اسرائیلی فوج نے ایک بار پھر غزہ شہر کے پناہ گزین سکول پر حملہ کیا، جس کے نتیجے میں 17 فلسطینی شہید اور 60 سے زیادہ شدید زخمی ہو گئے۔

عرب میڈیا کے مطابق، سکول پر ہونے والی بمباری کے بعد، امدادی کارروائیوں کے دوران اسرائیلی فوج نے مزید بم برسائے، جس سے انسانی المیہ مزید سنگین ہو گیا۔

عینی شاہدین کے مطابق ابتدائی حملے کے بعد امدادی ٹیمیں سکول کے متاثرہ افراد کو مدد فراہم کرنے میں مصروف تھیں کہ اسرائیلی فوج نے دوبارہ بمباری کی، جس کے نتیجے میں مزید نقصانات ہوئے۔

اسرائیلی فوج نے دعویٰ کیا ہے کہ اسکول کو حماس کے کمانڈ سینٹر کے طور پر استعمال کیا جا رہا تھا، جہاں جنگجو چھپنے اور ہتھیار بنانے کے لیے موجود تھے۔ تاہم، حماس نے ان الزامات کی تردید کی ہے۔

دوسری جانب اسرائیلی فوج نے حماس اور حزب اللہ کے کمانڈروں پر ٹارگٹڈ حملے تیز کر دیے ہیں۔ مقبوضہ مغربی کنارے میں کیے گئے دو ڈرون حملوں میں حماس کے عسکری ونگ القسام بریگیڈ کے کمانڈر سمیت 9 فلسطینی شہید ہو گئے۔ لبنان میں بھی اسرائیلی فضائی حملے کے دوران حزب اللہ کے اہم کمانڈر علی عبد علی شہید ہو گئے۔ حزب اللہ نے اسرائیلی اہداف کو راکٹوں اور توپوں سے نشانہ بنایا ہے۔

غزہ میں جاری کشیدگی میں 7 اکتوبر سے اب تک 39 ہزار 500 سے زیادہ فلسطینی شہید ہو چکے ہیں، جس سے علاقے میں انسانی بحران مزید سنگین ہو گیا ہے۔

کراچی : شہر قائد کراچی میں آئندہ 24 گھنٹوں کے دوران وقفے وقفے سے بارش کی پیشگوئی کی گئی ہے۔ محکمہ موسمیات کے مطابق منگل تک کہیں کہیں موسلادھار بارش کا بھی امکان ہے۔

شہر میں بادلوں کا ڈیرہ ہے اور موسم مرطوب ہے۔ شہر کے کچھ علاقوں میں حبس کی کیفیت بھی محسوس کی جا رہی ہے۔ آج کم سے کم درجہ حرارت 28 ڈگری سینٹی گریڈ اور زیادہ سے زیادہ درجہ حرارت 32 ڈگری سینٹی گریڈ رہنے کا امکان ہے۔

محکمہ موسمیات کا کہنا ہے کہ کراچی میں اگست کے مہینے میں موسم خوشگوار رہے گا۔ رات گئے شہر کے کچھ علاقوں میں ہلکی بارش ہوئی اور نصف شب کے دوران قائد آباد میں 4 ملی میٹر، کیماڑی اور شارع فیصل پر ایک ملی میٹر جبکہ گلشن معمار میں 0.2 ملی میٹر بارش ریکارڈ کی گئی۔

کوئٹہ: بلوچستان میں گزشتہ کئی دنوں سے جاری بارشوں کے باعث صوبے کے مختلف علاقوں میں سیلاب کی صورتحال پیدا ہو گئی ہے۔ سیلاب سے اب تک 12 افراد جاں بحق ہو چکے ہیں جبکہ متعدد افراد زخمی ہوئے ہیں۔

بلوچستان میں بارشوں سے ہونے والی ہلاکتوں کی تعداد 6 سے بڑھ کر 12 ہو گئی، صوبائی ڈیزاسٹر مینجمنٹ اتھارٹی کے مطابق صوبے میں بارش سے متعلقہ واقعات میں کل 12 افراد اپنی جانوں سے ہاتھ دھو بیٹھے اور 32 دیگر زخمی ہوئے۔

موسلادھار بارشوں کے باعث نئے گج، بولان، لہری اور مولا سمیت اہم دریاؤں میں سیلاب آ گیا ہے۔ سیلاب کے باعث زیارت، ہرنائی، ژوب، سنجاوی، لورالائی، قلعہ سیف اللہ، مسلم باغ اور خانوزئی سمیت متعدد علاقے متاثر ہوئے ہیں۔

حکام نے بتایا کہ سبی میں چار حفاظتی بند ٹوٹنے سے پانچ دیہات زیر آب آ گئے۔ صوبے کی اہم شاہراہیں بند ہو گئی ہیں اور ٹریفک معطل ہے۔ جھل مگسی میں کئی دیہات متاثر ہوئے اور گندواہ سے رابطہ منقطع ہو گیا۔

کوہلو میں 312 ایکڑ اراضی پر کھڑی فصلیں تباہ ہوئیں اور 19 کلومیٹر سڑکیں متاثر ہوئیں۔ حب ڈیم کی سطح میں چار فٹ کا اضافہ ہوا ہے۔

وزیراعلیٰ بلوچستان نے متاثرہ علاقوں میں ریلیف اور ریسکیو آپریشن کے لیے ہدایات جاری کی ہیں۔