محمود خان اچکزئی کو اصلی فارم 45 پر صدر بنائیں گے، علی محمد خان

پاکستان تحریک انصاف کے رہنما علی محمد خان نے کہا ہے کہ محمود خان اچکزئی کو اصلی فارم 45 پر صدر بنائیں گے،ان کے گھر چھاپہ افسوس ناک ہے، سیاسی اختلاف ہو سکتا ہے لیکن ایسے اقدامات ناقابل قبول ہیں، ایسے ہتھکنڈوں سے اجتناب کرنا چاہیئے، امید ہے مولانا فضل الرحمان بانی پی ٹی آٸی عمران خان کا ساتھ دیں گے، حق کی جیت ہوگی۔

اسلام آباد الیکشن آفس کے محمود اچکزئی کے ہمراہ میڈیا سے گفتگو کرتے ہوئے پی ٹی آئی کے رہنما علی محمد خان نے کہا کہ محمود خان اچکزئی کے کاغذات کی جانچ پڑتال کا عمل مکمل ہوچکا، محمود خان اچکزئی کے کاغذات منظور ہوگئے، کاغذات نامزدگی پراعتراضات لگتے رہتے ہیں۔

علی محمد خان نے کہا کہ پی ٹی آئی پاکستان کے ایک ایک بچے کی آواز ہے، محمود اچکزئی نے کہا آئین کے مطابق حکومت چلائیں، ہمیں امید ہے حق کی جیت ہوگی اور اچھا مقابلہ ہو گا۔ سیاست کرنا سیاستدانوں کا کام ہے۔کل رات محمود اچکزئی کے گھر پر چھاپہ مارا گیا، قوم اپنی فوج کےساتھ کھڑی ہے، ہم چاہتے ہیں ملک کو آئین کے مطابق چلائیں، کسی نہ کسی کو ہمارے اتحاد سے تکلیف تو پہنچے گی۔

پی ٹی آئی رہنما کا کہنا تھا کہ سیاسی اختلاف ہو سکتا ہے لیکن ایسے ہتھکنڈوں سے اجتناب کرنا چاہیئے، امید ہے حق کے راستے پر مولانا فضل الرحمان بانی پی ٹی آٸی کا ساتھ دیں گے۔