بانی چیئرمین پی ٹی آئی سے ملاقات نہ کرانے پر فریقین کو نوٹس جاری

اسلام آباد ہائیکورٹ نے پاکستان تحریک انصاف کے سابق چیئرمین عمران خان سے ملاقات نہ کرانے کی توہین عدالت کی درخواست پر فریقین کو نوٹس جاری کرتے ہوئے جواب طلب کر لیا۔

اسلام آباد ہائکورٹ کے جسٹس سردار اعجاز اسحاق خان نے عدالتی حکم کے باوجود وکلاء کی سابق چیئرمین پی ٹی آئی عمران خان سے ملاقات نہ کرانے کی توہین عدالت درخواست پرسماعت کی۔

عمران خان کے وکیل شیر افضل مروت عدالت کے روبرو پیش ہوئے اور مؤقف اپنایا کہ جیل جاتے ہیں تو روک دیا جاتا ہے، عدالت کا حکم تھا لیکن پھر بھی ہمیں ملاقات نہیں کرنے دی جاتی۔

عدالت کے باہر میڈیا سے گفتگو کرتے ہوئے شیر افضل مروت نے کہا کہ اسلام آباد ہائیکورٹ میں ہم نے جو بانی چیئرمین پی ٹی آئی کی طرف سے درخواست دی تھی خان صاحب سے ان کے وکلا کو اکیلے میں بات کرنے اور انکی فیملی کو ملنے کی اجازت دی جائے جو کہ ہمارا قانونی حق ہے، اس پر جج صاحب نے جیل سپرنٹنڈنٹ کو نوٹس جاری کر دیا جمعہ والے دن کیس مقرر ہوا ہے اور تین دن میں تحریری رپورٹ بھی طلب کر لی ہے۔

عدالت نے فریقین کو نوٹس جاری کرتے ہوئے جواب طلب کر لیا اور کیس کی سماعت آئندہ ہفتے تک ملتوی کردی۔