اسلام آباد ہائی کورٹ کا ایکس کی بندش کیخلاف فریقین کو نوٹسز جاری

پاکستان میں سوشل میڈیا پلیٹ فارم ایکس کی بندش کے خلاف درخواست پر اسلام آباد ہائی کورٹ نے فریقین کو نوٹسز جاری کر دیئے۔

 چیف جسٹس عامر فاروق نے ایکس کی بندش کیخلاف درخواست پر سماعت کی اور نوٹس جاری کرتے ہوئے کیس کی سماعت آئندہ ہفتے تک ملتوی کردی۔

 سماعت کے دوران درخواست گزار کے وکیل نے کہا کہ 17 فروری سے ایکس کی سروسز پاکستان میں بند ہیں۔

 اس کے جواب میں چیف جسٹس نے کہا کہ سندھ ہائیکورٹ میں بھی یہ معاملہ تھا اس پر کیا ہوا؟ جواب میں وکیل نے کہا کہ وہاں آج توہین عدالت کی درخواست پر سماعت ہونی ہے، 17 فروری سے حکومت نے ایکس پر پابندی عائد کر رکھی ہے

 اس پر چیف جسٹس عامر فاروق نے کہا کہ آئندہ ہفتے کیلئے نوٹس جاری کر رہا ہوں اور عدالت نے پی ٹی اے اور وزارت اطلاعات کو نوٹس جاری کرتے ہوئے کیس کی سماعت آئندہ ہفتے تک ملتوی کردی۔