آئی ایم ایف کا پی ٹی آئی کے خط سے متعلق اعلامیہ جاری

پاکستان میں انٹرنیشنل مانیٹری فنڈ (آئی ایم ایف) کی نمائندہ ایستھر پیریز نے عمران خان کے خط کے جواب میں کہا ہے کہ آئی ایم ایف مقامی اور سیاسی معاملات پر تبصرہ نہیں کرتا،  پاکستان کے سیاسی امور اندرونی معاملہ ہے

ایک بیان میں آئی ایم ایف کی نمائندہ ایستھر پیریز نے بتایا کہ آئی ایم ایف کو پاکستان تحریک انصاف (پی ٹی آئی) کی جانب سے 28 فروری کو ایک خط موصول ہوا جو پاکستان کے قرض پروگرام سے متعلق ہے۔ آئی ایم ایف سیاسی معاملات کو اندرونی معاملہ سمجھتا ہے، ایسے معاملے میں یہ عالمی ادارہ مداخلت نہیں کرتا۔

اعلامیہ میں مزید کہا گیا کہ ادارہ، پاکستان کیساتھ فنانشل استحکام کی ضمانت حاصل کرنے کی حوصلہ افزائی کرتا ہے، درینہ معاشی مسائل، واجبات کی ادائیگیوں اور تمام پاکستانیوں کی معاشی بہبود پر زور دیتا ہے۔ آئی ایم ایف نےکہا کہ ادارہ اقتصادی صورتحال کے پیش نظر انتخابی تنازع کے حل کی حوصلہ افزائی کرتا ہے۔

ایستھر پیریز نے مزید کہا کہ آئی ایم ایف ایک بین الاقوامی ادارہ ہے جس کا مینڈیٹ صرف معاشی مسائل تک محدود ہے، اس لیے وہ مقامی اور سیاسی مسائل پر تبصرہ نہیں کرتا۔پاکستان کے ساتھ ہمارے تعلقات کا مقصد مالی استحکام ہے۔ ہمارا مقصد شہریوں کے فائدے کے لیے پائیدار اور جامع ترقی ہے۔ یہ مضبوط پالیسیوں کے نفاذ کی حمایت کرنا بھی ہے۔

واضح رہے کہ پی ٹی آئی کے بانی عمران خان نے گزشتہ دنوں آئی ایم ایف کو خط لکھا تھا جس کی تصدیق انہوں نے خود کی تھی۔ خط میں عمران خان نے آئندہ بیل آؤٹ پیکج کے وقت پاکستان کے سیاسی استحکام کو مدنظر رکھنے کی درخواست کی تھی۔