بانی چیئرمین پی ٹی آئی خود لکھ کر دیں گے کہ وہ کس کس سے ملاقات کریں گے، عدالت

اسلام آباد ہائیکورٹ نے ریمارکس دیئے ہیں کہ بانی پی ٹی آئی خود لکھ کر دیں گے کہ وہ کس کس سے ملاقات کریں گے، عمران خان کے دیئے گئے ناموں کے علاوہ کوئی بھی شخص درخواست نہیں دے سکے گا۔

اسلام آباد ہائیکورٹ میں  چیئرمین پی ٹی آئی عمران خان سے  عدالتی حکم کے باوجود ملاقات نہ کرانے پرجیل سپرنٹنڈنٹ کے خلاف توہین عدالت کیس کی سماعت ہوئی جس دوران جیل سپرنٹنڈنٹ نےعدالت کو آگاہ کیا کہ 2 روز قبل اڈیالہ جیل کی بیک سائیڈ سے اسلحہ اور بارود برآمد ہوا،  دو افراد گرفتار ہوئے جس کی وجہ سے کل سارا دن سرچ آپریشن جاری رہا، سرچ آپریشن کی وجہ سے گزشتہ روز پی ٹی آئی رہنماؤں کو ملاقات کی اجازت نہ دی گئی۔

جسٹس سردار اعجاز نے  ریمارکس دیئے کہ بانی چیئرمین پی ٹی آئی خود لکھ کردیں گے کہ وہ کس کس سے ملاقات کریں گے، ان کے دیئے گئے ناموں کے علاوہ کوئی بھی دوسرا شخص درخواست نہیں دے سکے گا۔

عدالتی ریمارکس پر  شیر افضل مروت  نے عدالت سے  استدعا  کی جیل سپرنٹنڈنٹ مصروف ہوتے ہیں کوئی فوکل پرسن مقرر کردیں، اس پر جیل سپرنٹنڈنٹ کے کہنے پر ایڈیشنل سپرنٹنڈنٹ اڈیالہ جیل فوکل پرسن مقرر کر دیا گیا۔

جیل سپرنٹنڈنٹ نے کہا کہ ہم نے مشاورت سے عمران خان سے ملاقات کرنے والوں کیلئے دن مقرر کیے تھے، بانی پی ٹی آئی سے ملاقات کرنے والوں کی تعداد اب بڑھ گئی ہے، ان کی سکیورٹی کی وجہ سے ہمیں بہت سے کام روکنے پڑتے ہیں،استدعا ہے کہ ملاقات کرنے کے دن مقرر رہنے دیئے جائیں۔

دوران سماعت ایڈووکیٹ جنرل نے کہا کہ منگل اور جمعرات کے 2  دن مقرر ہیں جن میں 2، 2 سیشن ہوتے ہیں، ایک سیشن میں 6 افراد ملاقات کر سکتے ہیں۔

اس دوران ایڈووکیٹ جنرل  نے عدالت سے  استدعا کی کہ سماعت رمضان کے بعد تک ملتوی کردیں جس پر شیر افضل مروت نے کہا کہ رمضان میں تو خان صاحب باہر آجائیں گے، یہ درخواست غیر مؤثر کروانا چاہتے ہیں، شیرافضل مروت کی بات پر کمرہ عدالت میں قہقہےگونجنے لگے۔

بعد ازاں عدالت نے  کیس کی سماعت ہدایات کے ساتھ اگلے جمعہ تک ملتوی کردی۔