اسلام آباد یونائیٹڈ نے ملتان سلطان کو سنسنی خیز مقابلے کے بعد شکست دے دی

راولپنڈی: پاکستان سپر لیگ سیزن 9 کے 27ویں میچ کے دوران اتوار کو راولپنڈی سٹیڈیم میں کھیلے گئے سنسنی خیز میچ میں اسلام آباد یونائیٹڈ نے ملتان سلطانز کو تین وکٹوں سے شکست دے دی۔

پہلی اننگز میں ملتان سلطانز نے اسلام آباد یونائیٹڈ کو مقررہ 20 اوورز میں 229 رنز کا مشکل ہدف دیا۔ اسلام آباد یونائیٹڈ نے ہدف کا تعاقب 20ویں اوور کی آخری گیند پر کامیابی سے کرتے ہوئے سات وکٹوں کے نقصان پر حاصل کر لیا۔

کولن منرو نے اسلام آباد یونائیٹڈ کے لیے غیر معمولی کارکردگی کا مظاہرہ کرتے ہوئے 40 گیندوں پر 84 رنز بنائے جس میں نو چوکے اور پانچ چھکے شامل تھے۔ کپتان شاداب خان نے 54، فہیم اشرف نے 23 اور حیدر علی نے 19 رنز بنائے۔ تاہم سلمان علی آغا صرف 2 رنز بنا سکے، اور ایلکس ہیلز اسکور کرنے میں ناکام رہے۔

ملتان سلطانز کی جانب سے عباس آفریدی اور محمد علی نے دو دو جبکہ ڈیوڈ ولی اور کرس جارڈن نے ایک ایک وکٹ حاصل کی۔

اس سے قبل اننگز میں ملتان سلطانز نے مقررہ 20 اوورز میں چار وکٹوں کے نقصان پر 228 رنز بنائے۔ عثمان خان کی 50 گیندوں پر 100 رنز کی شاندار اننگز کے باوجود ٹیم فتح حاصل نہ کر سکی۔ جانسن چارلس نے 42، یاسر خان نے 33، کپتان محمد رضوان نے 20 اور صہیب مقصود نے 13 رنز بنائے۔ کرس جارڈن 15 رنز کے ساتھ ناٹ آؤٹ رہے۔

اسلام آباد یونائیٹڈ کی جانب سے فہیم اشرف نے دو وکٹیں حاصل کیں جبکہ نسیم شاہ اور حسن علی نے ایک ایک کھلاڑی کو آؤٹ کیا۔