آج دنیا بھر انسداد تمباکو نوشی کا عالمی دن منایا جا رہا ہے

تفصیلات کے مطابق   رواں برس اس دن کا مرکزی خیال یا تھیم " ترک کرنے کا  عہد "  ہے ۔ اس  دن منانے کا مقصد دنیا بھر کے لوگوں میں تمباکو نوشی کے مضر اثرات کے بارے میں شعور بیداری اور آگاہی پیدا کرنا ہے۔

  عالمی ادارہ صحت کے علاقائی دفتر نے تمباکو فری دن کے موقع پرانسداد تمباکو نوشی کے حوالے سے موثر اقدامات اٹھانے پر پاکستان کے لیے ''ورلڈنو ٹوبیکو ڈے 2021ایوارڈ''کا اعلان کیا ہے۔ عالمی ادارہ صحت کے مطابق  پاکستان میں ہر سال ایک لاکھ ساٹھ ہزار سے زائد افراد تمباکو نوشی کی وجہ سے موت کے منہ میں چلے جاتے ہیں ۔ پاکستان میں اس وقت2کروڑ93لاکھ افراد تمباکو نوشی کرتے ہیں ۔ عالمی ادارہ صحت کے مطابق تمباکو اور ایکسائز ٹیکس میں کم از کم 70فیصد اضافہ کیا جانا چاہیے۔ پاکستان انسٹی ٹیوٹ آف ڈیویلپمنٹ ایک حالیہ رپورٹ  کے مطابق تمباکو نوشی کی وجہ سے پھیلنے والی بیماریوں سے قومی خزانے کا سالانہ 400 ارب روپے سے زائد کا نقصان ہو تا ہے ۔ جبکہ تمباکو کی صنعت اس رقم کا صرف 20فیصد ٹیکس دیتی ہے۔

رپورٹ کے مطابق تمباکو نوشی سے پھیلنے والی بیماریوں پر ہو نے والے اخراجات میں سے71فیصد کینسر،دل اور پھیپھڑوں کی بیماریوں پر خرچ ہو تا ہے،سرکاری اعدادوشمار کے مطابق  پاکستان کو گزشتہ پانچ سال کے دوران تمباکو پر ٹیکس کی مد میں209ارب روپے کا نقصان ہوا۔ 2017ء میں تمباکو کی مصنوعات پر ٹیکسوں میں تیزی سے کمی آئی جس کی وجہ حکومت کی طرف سے سگریٹس پر تین درجاتی ٹیکس کا نظام لاگو کیا جانا ہے۔پاکستان میں تین درجاتی ٹیکس کا نظام آنے کے بعد سیگریٹس کی پیداوار 90فیصد بڑھی ہے۔