پاکستان اور آئی ایم ایف کے درمیان سٹاف لیول معاہدہ طے پا گیا

پاکستان اور آئی ایم ایف کے درمیان سٹاف لیول معاہدہ طےپا گیا، معاہدے کے تحت پاکستان کو 1.1 ارب ڈالر کی قسط جاری کی جائے گی، آئی ایم ایف ایگزیکٹو بورڈ پاکستان کو 1.1 ارب ڈالر قرض قسط کی منظوری دے گا۔

معاہدے کے تحت جون میں 9 لاکھ دکانداروں کو فکس ٹیکس میں لایا جائےگا۔ بے نظیر انکم پروگرام کے اخراجات وفاقی اور صوبائی حکومت مل کر برداشت کریں گے۔ رئیل اسٹیٹ اور زراعت کو بھی ٹیکس نیٹ میں لانے کے اقدامات پر اتفاق ہو گیا۔ موسمیاتی تبدیلی سے نقصانات کے بعد بحالی اخراجات کی بھی نئی حکمت عملی تیار ہو گی۔

آئی ایم ایف اعلامیے کے مطابق پاکستان کی معاشی صورتحال میں بہتری دیکھی گئی ہے۔ معاشی صورتحال میں بہتری کے لیے مزید ریفارمز کی ضرورت ہے۔ حکومت معیشت کی بہتری کے لیے اسٹیٹ بینک کی پالیسی جاری رکھنے کے لیے پُرعزم ہے۔ کثیرالجہتی اور دو طرفہ شراکت داروں سے رقوم کی بحالی میں بہتری آئی ہے، اس سال پاکستان میں ترقی معمولی رہنے کی توقع اور افراط زر ہدف سے کافی زیادہ ہے۔

آئی ایم ایف کا کہنا ہے کہ اقتصادی کمزوریوں سے نمٹنے کیلئے جاری پالیسی اور اصلاحات کی ضرورت ہے، حکومت پاکستان نے مسائل کے مستقل حل کیلئے متوسط مدتی فنڈ میں دلچسپی ظاہر کی ہے۔اسٹیٹ بینک آف پاکستان اور نگران حکومت کی جانب سے حالیہ مہینوں میں آئی ایم ایف شرائط پر سختی سے عمل درآمد کیا گیا۔ دوسری طرف نئی حکومت نے بھی پاکستان کو معاشی طور پر مستحکم بنانے کے لیے ان پالیسیوں کے تسلسل کو جاری رکھنے کا ارادہ ظاہر کیا ہے۔

اس حوالے سے وزیر خزانہ محمد اورنگزیب نے کہا ہے کہ 11 اپریل کو مختصر مدت کے اسٹینڈ بائی انتظامات ختم ہونے کے بعد پاکستان آئی ایم ایف سے ایک اور بیل آؤٹ طلب کرے گا۔