سات رکنی مینز سلیکشن کمیٹی میں چار ٹیسٹ کرکٹرز کے نام شامل ،چیئر مین پی سی بی

لاہور: چیئرمین پی سی بی محسن نقوی نے مینز سلیکشن کمیٹی کا اعلان پاکستان کرکٹ کے ہیڈ کوارٹر قذافی اسٹیڈیم لاہور میں پریس کانفرنس کے دوران کیا۔

سلیکشن کمیٹی میں سابق ٹیسٹ کھلاڑی وہاب ریاض، محمد یوسف، عبدالرزاق اور اسد شفیق سمیت 7 ارکان شامل ہیں جبکہ متعلقہ قومی مینز ٹیم کے کپتان اور کوچ بھی کمیٹی کا حصہ ہوں گے۔ ساتواں رکن ڈیٹا اینالسٹ ہو گا، جو ممبران کو انتخاب میں مدد کے لیے اعداد و شمار اور ڈیٹا فراہم کرنے کا ذمہ دار ہو گا۔

27 ٹیسٹ، 91 ون ڈے اور 36 ٹی ٹوئنٹی کھیلنے والے وہاب ریاض سابق سلیکشن کمیٹی کے چیئرمین تھے۔ محمد یوسف نے پہلے اے سی سی انڈر 19 ایشیا کپ اور آئی سی سی مینز انڈر 19 ورلڈ کپ 2024 میں پاکستان مینز انڈر 19 ٹیم کی بطور ہیڈ کوچ قیادت کی تھی۔

محمد یوسف نے 90 ٹیسٹ، 288 ون ڈے اور تین ٹی ٹوئنٹی میں پاکستان کی نمائندگی کی ، حال ہی میں مسابقتی کرکٹ سے ریٹائرمنٹ کا اعلان کرنے والے اسد شفیق نے دس سالہ بین الاقوامی کیریئر میں پاکستان کے لیے 77 ٹیسٹ، 60 ون ڈے اور 10 ٹی ٹوئنٹی کھیلے۔ عبدالرزاق نے اپنے کیریئر میں 46 ٹیسٹ، 265 ون ڈے اور 32 ٹی ٹوئنٹی کھیلے۔

سلیکشن کمیٹی کا کوئی چیئرمین نہیں ہوگا جس میں ہر رکن کو مساوی اختیارات حاصل ہوں گے اور یہی کمیٹی قومی سلیکشن کے معاملات کے علاوہ انڈر 19 اور اے ٹیم کے انتخاب کی بھی ذمہ دار ہوگی۔

چیئرمین پی سی بی محسن نقوی: "میں نے چار سابق ٹیسٹ کھلاڑیوں پر مشتمل سات رکنی سلیکشن کمیٹی کو مینڈیٹ دیا ہے کہ وہ بین الاقوامی کرکٹ کے لیے قومی مردوں کی ٹیموں کا انتخاب کرے۔ سلیکشن کمیٹی کے کام میں مداخلت نہیں کروں گا۔ وہ اپنے ڈومین میں تجربہ کار اور پیشہ ور ہیں اور مجھے یقین ہے کہ وہ اپنا کام لگن اور ایمانداری کے ساتھ کریں گے۔