فیفا ورلڈکپ کوالیفائر راؤنڈ، افغانستان کے ہاتھوں بھارت کو شکست

فیفا ورلڈکپ کوالیفائر 2026 کے دوسرے مرحلے کے گروپ میچ میں افغانستان نے بھارت کو ایک کے مقابلے میں دو گول سے شکست دے دی۔

بھارتی شہر گواہاٹی کے اندرا گاندھی ایتھلٹک اسٹیڈم میں گزشتہ روز افغانستان اور بھارت کی ٹیموں کے درمیان مقابلہ ہوا۔ بھارت کے اسٹار فٹبالر سُنیل چیتھری نے پہلے ہاف کے38 ویں منٹ میں گول اسکور کرتے ہوئے اپنی ٹیم کو برتری دلائی۔

میچ کے ہاف ٹائم پر مقابلہ ایک صفر تھا لیکن دوسرے ہاف میں افغانستان نے بہتر کھیل پیش کرتے ہوئے دو گول اسکور کیے۔ افغانستان کے رحمت اکبری نے 70 ویں منٹ میں گول مار کر مقابلہ برابر کیا۔

میچ میں مزید جان اس وقت آئی جب مقررہ وقت ختم ہونے سے دو منٹ پہلے افغانستان کے کھلاڑی شریف محمد نے پنالٹی کک پر گول کرکے اپنی ٹیم کو دو ایک سے تاریخی کامیابی دلائی۔