صدر آ صف علی زرداری کی ترکمانستان کے سفیر سے ملاقات

لاہور: صدر آصف علی زرداری نے دو طرفہ تعاون کو مزید فروغ دینے کے لیے ترکمانستان کے ساتھ ٹرانزٹ ٹریڈ معاہدے کو جلد حتمی شکل دینے پر زور دیا۔

وہ پاکستان میں ترکمانستان کے سفیر عطاجان مولاموف سے گفتگو کر رہے تھے جنہوں نے پیر کو اسلام آباد میں ان سے ملاقات کی۔

صدر مملکت آصف علی زرداری نے کہا کہ معاہدے پر دستخط ہونے کے بعد تجارت کو وسعت دینے، علاقائی رابطوں کو فروغ دینے اور خطے میں اقتصادی سرگرمیوں کو بڑھانے میں مدد ملے گی۔

ترکمانستان کے سفیر نے صدر مملکت کو دوسری بار صدر کا عہدہ سنبھالنے پر مبارکباد بھی پیش کی ۔

انہوں نے دونوں اطراف نے تاپی گیس پائپ لائن کی جلد تکمیل کی خواہش کا اظہار کیا، انہوں نے کہا کہ اس سے نہ صرف پاکستان کی معیشت کو سہارا ملے گا بلکہ اس کی توانائی کی ضروریات کو پورا کرنے میں بھی مدد ملے گی۔

صدر مملکت نے سفیر کا خیرمقدم کرتے ہوئے کہا کہ پاکستان ترکمانستان کے ساتھ اپنے دوطرفہ تعلقات کو خصوصی اہمیت دیتا ہے۔

انہوں نے پاکستان کی جانب سے ترکمانستان کے ساتھ باہمی فائدہ مند تعاون کو مزید بڑھانے کے لیے کام کرنے کی خواہش کا اظہار کیا۔

صدر نے اس بات پر روشنی ڈالی کہ دونوں ممالک کے درمیان تجارت کے موجودہ حجم کو دونوں ممالک کے باہمی فائدے کے لیے بہتر بنانے کی ضرورت ہے۔