رمضان المبارک کے مہینے میں بھی اشیائے ضروریہ کی قیمتوں میں کمی نہ ہو سکی

رمضان المبارک کے بابرکت مہینے میں بھی اشیائے ضروریہ کی قیمتوں میں کمی نہ ہو سکی۔

وفاقی ادارہ شماریات کے مطابق مارچ 2024 میں مہنگائی میں 1.7 فیصد اضافہ ریکارڈ کیا گیا جس کے بعد سالانہ مہنگائی کی شرح 20.7 فیصد ریکارڈ کی گئی۔

ادارہ شماریات کی رپورٹ کے مطابق شہری علاقوں میں مہنگائی 21.9 فیصد اور دیہی علاقوں میں 19 فیصد رہی، گزشتہ ماہ کے دوران ٹماٹر 52 فیصد، پیاز 28 فیصد اور آلو 24 فیصد مہنگے ہوئے۔

اسی طرح پھل 22 فیصد، سبزیاں 13 فیصد، گوشت چار فیصد، دالیں دو فیصد مہنگی ہو گئیں۔ مشروبات، تیار کھانے، چینی، مصالحہ جات، چنے کے آٹے کی قیمتوں میں بھی اضافہ ہوا۔

گزشتہ ماہ بجلی میں 5.11 فیصد، درزی کی فیس میں 3.13 فیصد اور گارمنٹس کی قیمت میں 2.22 فیصد اضافہ ہوا۔ موٹر فیول اور ادویات کی قیمتیں بھی بڑھ گئیں۔ جبکہ مارچ میں چکن، کوکنگ آئل، انڈے، گندم، آٹا، گھی، بیکری، خشک، گریاں سستی ہوگئیں۔