ورلڈ بینک نے پاکستان میں موجودہ معاشی استحکام غیر پائیدا قرار دے دیا

ورلڈ بینک نے پاکستان میں موجودہ معاشی استحکام غیر پائیدا قرار دیتے ہوئے کہا کہ سبسڈیز اور گرانٹس معیشت پر بوجھ ہیں۔ توانائی سمیت سرکاری اداروں میں مشکل اصلاحات ناگزیر ہیں۔

ورلڈ بینک نے پاکستان ڈولپمنٹ آؤٹ لک رپورٹ جاری کر دی جس میں کہا گیا ہے کہ  آئندہ مالی سال 2024-25 کے دوران ملک میں مہنگائی کی شرح میں کمی کی پیش گوئی کر دی ہے تاہم اگلے تین سال کے دوران ملک کی جی ڈی پی کی شرح تین فیصد رہنے اور رواں مالی سال کے دوران 1.8فیصد رہنے کی توقع ہے جبکہ پاکستان میں 40 فیصد لوگ خط غربت سے نیچے زندگی گزار رہے ہیں۔

ورلڈ بینک کے مطابق رواں مالی سال پاکستان کی شرح نمو 3.5 فیصد کی بجائے1.8 فیصد، سال 2025 میں 2.3 فیصد اور سال 2026 میں 2.7 فیصد رہنے کا امکان ہے جبکہ رواں مالی سال زرعی شرح نمو 3 فیصد، سال 2025 میں 2.2 فیصد اور سال 2026 میں زرعی شرح نمو 2.7 فیصد رہنے کا امکان ہے۔

رواں مالی سال مہنگائی کی شرح 26 فیصد جب کہ مالی سال 2025 میں 15 فیصد تک اور مالی سال 2026 میں مہنگائی کی شرح 11.5 فیصد تک رہنے کی توقع ہے اس کے علاوہ پنشن اور سول سروس کے شعبے میں بھی اصلاحات ناگزیر ہیں۔

ورلڈ بینک کا کہنا ہے کہ رواں مالی سال صنعتی ترقی کی نمو 1.8 فیصد، مالی سال 2025 میں صنعتی ترقی 2.2 فیصد اور مالی سال 2026 میں 2.4 فیصد رہنے کی توقع ہے۔

اس کے علاوہ، رواں مالی سال مالیاتی خسارہ جی ڈی پی کے 8 فیصد تک، مالی سال2025 میں 7.4 فیصد اور مالی سال 2026 میں مالیاتی خسارہ جی ڈی پی کے 6.6 فیصد تک رہنے کی توقع ہے۔