پاکستان میں چینی باشندوں کی سیکیورٹی پر کوئی سمجھوتا نہیں کیا جائے گا ،وزیر اعظم

اسلام آباد : وزیراعظم شہبازشریف نے قانون نافذ کرنے والے اداروں کو ہدایت کی ہے کہ پاکستان میں چین کے باشندوں کی جامع سکیورٹی کو یقینی بنایا جائے۔

انہوں نے  جمعہ کے روز اسلام آباد میں امن و امان کی صورتحال سے متعلق اجلاس کی صدارت کرتے ہوئے کہا کہ کسی کو بھی ملک میں دہشت گردی کی اجازت نہیں دی جائے گی ۔ 

وزیراعظم شہباز شریف نے سکیورٹی قواعد و ضوابط کی باقاعدگی سے جانچ پڑتال کیلئے جامع لائحہ عمل وضع کرنے کی بھی ہدایت کی۔

انہوں نے ملک سے دہشت گردی کے ناسور کے خاتمے تک اس کیخلاف جنگ جاری رکھنے کے قومی عزم کا اعادہ کیا ہے۔وزیراعظم نے وزارت داخلہ کو ہدایت کی کہ انسداد دہشت گردی کے صوبائی اداروں کو مزید بہتربنانے کیلئے صوبوں کے ساتھ تعاون بڑھایا جائے۔

انہوں نے ملکی کی سلامتی خصوصاً مختلف منصوبوں پر کام کرنے والے چینی شہریوں کیلئے سکیورٹی اقدامات اور ماہانہ اجلاسوں کی خود نگرانی کرنے کا فیصلہ کیا۔

واضح رہے کہ وزارت داخلہ نے ملک میں امن وامان کی مجموعی صورتحال کے حوالے سے وزیراعظم کو تفصیلی بریفنگ دی۔