میرے بیٹوں کی شہادت ہمیں ہمارے موقف سے پیچھے نہیں ہٹائے گی، اسماعیل ہنیہ

حماس کے سربراہ اسماعیل ہنیہ نے کہا ہے کہ میرے بیٹوں کا خون میرے لوگوں (فلسطینیوں) کے خون سے زیادہ قیمتی اور محبوب نہیں۔

قطر کے میڈیا آؤٹ لیڈ الجزیرہ کے مطابق اسماعیل ہنیہ کا کہنا ہے کہ ہمارے مطالبات بالکل واضح ہیں۔ ہم اس معاملے میں کوئی سمجھوتا نہیں کریں گے۔ دشمن اگر یہ سمجھتا ہے کہ مذاکرات کے انتہائی اہم مرحلے میں میرے بیٹوں کو شہید کرکے وہ حماس کو اپنے موقف سے پیچھے ہٹنے پر مجبور کردے گا تو یہ اس کی بھول ہے۔

ہنیہ کے سب سے بڑے بیٹے عبدالسلام ہنیہ نے فیس بک پر اپنے تین بھائیوں اور ان کے بچوں کی شہادت کی تصدیق کی۔ اس فیملی کی کار کو اس وقت نشانہ بنایا گیا جب وہ عید منانے کے سلسلے غزہ کے الشتی کیمپ میں اپنے گھر کی طرف جارہی تھی۔

61 سالہ اسماعیل ہنیہ کے 13 بیٹے بیٹیاں ہیں۔ اسرائیلی فوج کے ایک حملے میں ان کے تین بیٹوں (حازم، عامر اور محمد) کے علاوہ تین پوتے اور ایک پوتی بھی شہید ہوئی۔

اسماعیل ہنیہ کو 2017 میں حماس کا سربراہ مقرر کیا گیا۔ تب انہوں نے اسرائیل کی طرف سے سفر پر عائد کی جانے والی پابندیوں سے بچنے کے لیے کبھی ترکیہ اور کبھی قطر میں سکونت اختیار کی ہے۔ قطر میں سکونت پذیر ہونے کی بدولت وہ حماس کے مرکزی اتحادی ایران کے ساتھ اسرائیل سے جنگ بندی کے معاملے پر گفت و شنید کی پوزیشن میں رہے ہیں۔

حماس کا مطالبہ ہے کہ اسرائیل فوری جنگ بندی کا اعلان کرے، اسرائیلی فوج کو فلسطینی علاقوں سے نکالا جائے اور نقل مکانی کرنے والے فلسطینیوں کو ان کے گھروں میں دوبارہ آباد ہونے کی اجازت دی جائے۔

واضح رہے کہ اسرائیلی فضائی حملے میں اسماعیل ہنیہ کے تین بیٹوں کی موت ہوئی ہے،غزہ کے الشاطی کیمپ میں ایک کار پر بمباری کے نتیجے میں ہنیہ کے بیٹے حازم إسماعيل هنية اور ان کی دو بیٹیاں منی اور آمال، امیر اسماعیل هنية اور ان کے دو بیٹے خالد اور رزان، محمد اسماعیل ہنیہ جبکہ ان کی بیٹی ملاک شدید زخمی ہیں۔