ایران اسرائیل تنازع، سعودی عرب کا خطے میں فوجی کشیدگی بڑھنے پر گہری تشویش کا اظہار

ایران کی جانب سے اسرائیل پر ردعمل کے طور پر کیے جانے والے حملے پر سعودی عرب نے خطے میں فوجی کشیدگی بڑھنے پر گہری تشویش کا اظہار کیا ہے۔

غیر ملکی میڈیا رپورٹس کے مطابق سعودی وزارت خارجہ نےجاری بیان میں خطے میں فوجی کشیدگی میں اضافے اور اس کے اثرات کی سنگینی پر گہری تشویش کا اظہار کرتے ہوئے تمام فریقین پر زور دیا کہ وہ انتہائی تحمل کا مظاہرہ کریں۔

وزارت نے خطے اور اس کے عوام کو وسیع جنگ کے ’سنگین اثرات‘ سے خبردار بھی کیا ہے۔وزارت خارجہ نے سعودی عرب کے موقف کا اعادہ کرتے ہوئے سلامتی کونسل کو عالمی امن و سلامتی کو برقرار رکھنے کےلیے اپنی ذمہ داری نبھانے کی ضرورت پر زور دیا ہے۔

سعودی عرب کا کہنا ہے کہ تمام فریقین خطے اور اس کے لوگوں کو جنگوں کے خطرات سے بچانے کی کوشش کریں۔

مصر نے بھی خطے اورعوام کو عدم استحکام اور کشیدگی سے بچانے کیلئے قریقین سے تحمل کا مظاہرہ کرنے پر زور دیا ہے۔

اقوام متحدہ کے سیکرٹری جنرل انتونیو گوتریس نے اسرائیل پر ایرانی حملے کی مذمت کرتے ہوئے فریقین سے فوری جنگ بندی کی اپیل کی اور کہا کہ کسی بھی ایسی کارروائی سے گریز کیا جائے جس سے بڑے فوجی تصادم کا خدشہ ہو۔