وزیر اعظم نے دہشتگردوں کے خلاف کارروائی پر سیکورٹی فورسز کی کاوشوں کو سراہا

وزیراعظم محمد شہبازشریف نے ضلع بونیر میں دہشتگردوں کے خلاف کارروائی پر سیکورٹی فورسز کی تعریف کی ہے۔

وزیراعظم نے کہا کہ پاک فوج کے بہادر جوانوں نے اپنی پیشہ ورانہ مہارت سے کام لیتے ہوئے ملک دشمنوں کو جہنم واصل کیا۔انہوں نے کہا کہ میں پوری قوم کے ساتھ اپنے دلیر فوجیوں کو اس جراتمندانہ کارروائی پر خراج تحسین پیش کرتا ہوں۔

وزیراعظم نے اپنے پیغام میں لانس حوالدار مدثر محمود اور لانس نائیک حسیب جاوید کی شہادت پر گہرے دکھ اور افسوس کا اظہار کیا۔

انہوں نے شہداء کے درجات کی بلندی اور سوگوار خاندانوں کیلئے یہ صدمہ برداشت کرنے کی ہمت اور حوصلے کی دعا کی۔وزیراعظم نے کہا کہ وطن عزیز کے فرزندوں کی بے مثال قربانیاں پوری قوم کیلئے باعث فخر ہیں۔