میو اسپتال :گارڈ کے ہاتھوں خاتون کا آپریشن ، مریضہ دم توڑ گئی

تفصیلات کے مطابق   متاثرہ خاتون پندرہ روز تک زندگی موت کی کشمکش میں مبتلا رہنے کے بعد دم توڑ گئی ہے، شمیم بی بی کو کمر پر زخم کے باعث میو اسپتال علاج کے لیئے لایا گیا تھا،  وحید بٹ نامی سکیورٹی گارڈ نے جعلی ڈاکٹر بن کر خاتون کا آپریشن کر ڈالا تھا۔

خاتون کے بیٹے شفاقت علی کا کہنا ہے کہ  میری والدہ کل شام کو انتقال کر گئی ہیں،  کل شام سے اسپتال انتظامیہ نے لاش سردخانہ میں رکھی ہوئی ہے،  اسپتال انتظامیہ کی جانب سے ہمارے ساتھ ہی ناروا سلوک کیا جا رہا ہے۔

اسپتال انتظامیہ کا کہنا ہے کہ  قانونی وجوہات کے باعث متوفی کا پوسٹ مارٹم ہونا ضروری ہے،  لاش کو صرف پوسٹ مارٹم کے لیئے سرد خانہ میں رکھا گیا ہے۔

گزشتہ ماہ  میو ہسپتال کے گارڈ نے ضعیف مریضہ کا سرجیکل ٹاور میں آپریشن کر ڈالا تھا۔ پرائیویٹ سکیورٹی کمپنی کے گارڈ وحید بٹ نے 80 سالہ خاتون کا آپریشن کیا تھا۔ زیادہ خون بہنے سے مریضہ کی حالت تشویشناک ہونے سرجیکل ٹاور میں داخل کردیا گیا تھا۔

17 مئی کی شام مریضہ کو کمر پر پھوڑے کے علاج کیلئے سرجیکل ایمرجنسی لایا گیا تھا۔ سکیورٹی گارڈ نے مائنر آپریشن تھیٹر میں مریضہ کی خود ہی سرجری کر ڈالی۔ لواحقین کا کہنا تھا کہ غلط آپریشن سے خون بند نہ ہوا لیکن پٹی کر کے گھربھجوا دیا، 2 روز سکیورٹی گارڈ مریضہ کے گھرجا کر پٹی کرتا رہا۔ خون بند نہ ہونے سے حالت بگڑ گئی تو مریضہ کو دوبارہ ہسپتال لانے پر حقیقت سامنے آئی۔ انتظامیہ نے سکیورٹی اہلکار وحید بٹ کو پولیس کے حوالے کر دیا تھا۔