کرغزستان میں پھنسے پاکستانی طلباء کی ایک اور پرواز پشاور پہنچ گئی

کرغزستان میں پھنسے پاکستانی طلباء کو لے کر ایک اور پرواز پشاور پہنچ گئی ہے۔

ذرائع کے مطابق کرغزستان سے پاکستان طلباء کی واپسی کا سلسلہ جاری ہے، 290 طلباء کو لے کر خصوصی پرواز پشاور کے باچا خان ایئرپورٹ پہنچی ہے، طلبا کے استقبال کیلئے والدین اور رشتہ دار ایئرپورٹ پر موجود تھے۔

یاد  رہے کہ ایک روز قبل بھی کرغزستان سے دو پروازوں کے ذریعے 346 طلباء وطن واپس پہنچے تھے۔

ایک پرواز نیو اسلام آباد انٹرنیشنل پر خصوصی پرواز 171 طلباء و طالبات کو لیکر اتری جہاں سینیٹر مصدق ملک نے طلبا کا استقبال کیا۔

دوسری پرواز بشکیک سے 175 طلبا کو لے کر لاہور کے علامہ اقبال انٹرنیشنل ایئرپورٹ پر اتری جہاں وفاقی وزیر اطلاعات عطاء اللہ تارڑ نے وطن واپس آنے والے طلبا کا استقبال کیا۔