محسن نقوی سے سری لنکن ہائی کمشنر کی ملاقات، قیدیوں کی واپسی پر اتفاق

وفاقی وزیر داخلہ محسن نقوی سے سری لنکاکے ہائی کمشنر ایڈمرل (ر) رویندرا چندرا سری وجے گونارتنےکی ملاقات ہوئی جس میں 43 پاکستانی قیدیوں کی فوری واپسی پر اتفاق کیا گیا۔

سری لنکا کے ہائی کمشنر نے ہر ممکن تعاون کی یقین دہائی کرائی جس پر محسن نقوی نے ان کا شکریہ ادا کیا۔

محسن نقوی اور سری لنکن ہائی کمشنر کی ملاقات کے دوران سکیورٹی اور انسداد منشیات کے سلسلے میں تعاون بڑھانے پر بھی اتفاق کیا گیا۔

وزیر داخلہ نے کہا کہ قیدیوں کے واپسی کے حوالے سے حکومت پہلے سے کام کررہی تھی۔ قیدیوں کے واپسی کے حوالے سے انتظامات چند روز میں کر لئے جائیں گے۔

انہوں نے مزید کہاکہ سری لنکا اور پاکستان کے درمیان تعلقات مضبوط تر ہوتے جا رہے ہیں، پاکستان تعلقات کو مختلف شعبوں میں مزید مضبوط کرنے کا خواہاں ہے۔