پنجاب میں آندھی ،طوفان :آسمانی بجلی گرنے سے 6 شہری جاں بحق

صوبائی ڈیزاسٹر مینجمنٹ اتھارٹی (پی ڈی ایم اے) نے گزشتہ روز ایک بیان میں کہا کہ آسمانی بجلی گرنے اور مٹی کے طوفان نے ایک دن پہلے پنجاب کے مختلف علاقوں میں کم از کم 6 افراد کی جان لے لی۔

پی ڈی ایم اے کے ترجمان نے بتایا کہ صوبے میں مٹی کے طوفان سے کم از کم پانچ افراد زخمی بھی ہوئے۔ترجمان نے مزید کہا کہ آسمانی بجلی گرنے کے واقعات سیالکوٹ اور راولپنڈی کے اضلاع میں پیش آئے۔

ڈی جی پنجاب پی ڈی ایم اے عرفان علی کاٹھیا نے متعلقہ اضلاع کے ڈپٹی کمشنرز کو زخمیوں کو بہترین طبی امداد فراہم کرنے کی ہدایت کی۔انہوں نے کہا کہ مرنے والوں کے اہل خانہ کو مالی امداد فراہم کی جائے گی۔

تمام ریسکیو اور دیگر ادارے کسی بھی ناخوشگوار صورتحال سے نمٹنے کے لیے چوکس ہیں۔ڈی جی پی ڈی ایم اے نے شہریوں پر زور دیا کہ وہ خراب موسم کے دوران محفوظ مقامات پر رہیں اور گرج چمک کے دوران باہر جانے سے گریز کریں۔

وزیراعلیٰ پنجاب مریم نواز شریف نے طوفان کے دوران قیمتی جانوں کے ضیاع پر دکھ کا اظہار کرتے ہوئے سوگوار خاندانوں سے دلی ہمدردی کا اظہار کیا۔

انہوں نے مزید کہا کہ زخمیوں کے لیے بہترین طبی سہولیات کو یقینی بنانا ترجیح ہے۔