اگلے ہفتے گرمی کی شدت میں مزید اضافے کا امکان

محکمہ موسمیات نے کہا کہ موسم کے اعتبار سے اگلا ہفتہ انتہائی اہم ہے۔

محکمہ موسمیات کے مطابق کراچی میں اگلے ہفتے گرمی کی شدت میں اضافے کا امکان ہے۔ موسمیاتی تجزیہ کار اویس حیدر کی جانب سے بتایا گیا ہے کہ منگل سے جمعرات تک شہر کے درجہ حرارت میں اضافہ ہو سکتا ہے۔ اس دوران زیادہ سے زیادہ درجہ حرارت 40 سے 42 ڈگری سینٹی تک بھی پہنچ سکتا ہے جس کے سبب کراچی میں اگلا ہفتہ سال کا گرم ترین ہفتہ رہ سکتا ہے۔

دوسری جانب لاہور میں بھی شدید گرمی کے  باعث آج پارہ 44 ڈگری سینٹی گریڈ تک جانے کا امکان ہے۔

محکمہ موسمیات کے مطابق لاہور سمیت پنجاب کے مختلف اضلاع میں شام کے وقت گردآلود ہوائیں چلنے کے امکانات ہیں تاہم آئندہ دو روز تک موسم خشک اور گرم رہے گا۔

جیکب آباد اور موہنجو داڑو میں 47، لاڑکانہ اور سبی میں 46، ڈیرہ غازی خان، بھکر اور رحیم یار خان میں  45 ڈگری سینٹی گریڈ ریکارڈ کیا گیا۔

اسلام آباد میں 38، لاہور میں 41، کراچی میں 35، پشاور میں 39، کوئٹہ میں 33، گلگت اور مظفر آباد میں 32، اسکردو اور مری میں 28، فیصل آباد اور ملتان میں 41 ڈگری سینٹی گریڈ ریکارڈ کیا گیا۔

محکمہ موسمیات کے مطابق بارش کا کوئی امکان نہیں ہے۔

علاوہ ازیں ماہرین طب نے شہریوں کو بلا ضرورت گھر سے باہر نکلنے سے گریز کرنے کے ساتھ ٹھنڈے پانی اور ہلکے کپڑے پہننے کی ہدایت کی ہے۔