بجلی کی لوڈشیڈنگ پر شہری سراپا احتجاج،ٹریفک معطل

کراچی میں بجلی کی غیر اعلانیہ لوڈشیڈنگ کے خلاف عوام سڑکوں پر نکل آئے، جس سے ٹریفک کا نظام معطل ہو گیا۔

شاہ لطیف ٹاؤن کے علاقے ظفر ٹاؤن میں علاقہ مکینوں نے بجلی کی عدم فراہمی پر احتجاج کرتے ہوئے ٹریفک معطل کر دیا جس کے باعث بدترین ٹریفک جام ہوگیا۔

پولیس نے ہوائی فائرنگ کرنے والے 4 مظاہرین کو گرفتار کر کے اسلحہ برآمد کرلیا ۔ایس ایچ او شاہ لطیف ملک سلیم نے بتایا کہ مظاہرین کو بات چیت کے ذریعے منتشر کرنے کی کوشش کی تاہم ناکامی پر پولیس نے لاٹھی چارج کر کے انھیں منتشر کردیا جبکہ اس موقع پر مظاہرین میں شامل افراد کی جانب سے ہوائی فائرنگ بھی کی گئی۔

اس پر پولیس نے فوری کارروائی کرتے ہوئے 4 افراد کو گرفتار کر کے اسلحہ برآمد کرلیا جبکہ پولیس کی نفری کو بھی تعینات کر دیا۔

دریں اثنا عبداللہ کالج کی جانب سے اورنگی ٹاؤن جانے والے بنارس پل کے ٹریک پر علاقہ مکینوں نے بجلی اور پانی کی عدم فراہمی پر احتجاج کرتے ہوئے ٹریفک معطل کر دیا جس کے باعث گاڑیوں کی طویل قطاریں لگ گئیں۔

مظاہرین کی جانب سے کے الیکٹرک کے خلاف شدید نعرے بازی کی گئی اور فوری طور پر بجلی کی فراہمی کا مطالبہ کیا گیا تاہم پولیس نے موقع پر پہنچ کر مظاہرین کو بات چیت کے بعد منتشر کر کے ٹریفک بحال کرا دیا ۔