وزیراعلیٰ پنجاب کا گندم کی خریداری میں کسانوں کو براہ راست سبسڈی دینے کا اعلان

وزیراعلیٰ پنجاب مریم نواز  نے گندم کی خریداری میں کرپشن کے خاتمے کے لیے کسانوں کو براہ راست سبسڈی دینے کا اعلان کردیا۔

وزیراعلیٰ پنجاب مریم نواز سے ارکان اسمبلی نے ملاقات کی جس دوران گفتگو کرتے ہوئے وزیراعلیٰ نے کہا کہ گندم خریداری میں گھپلے ہوتے تھے، اب ڈائریکٹ کسان کو سبسڈی دیں گے۔

وزیراعلیٰ پنجاب نے کہا کسان کارڈ پروگرام میں رجسٹریشن کے لیے اسپیشل ہیلپ لائن قائم کرنے کا فیصلہ کیا اور کاشت کاروں کے لیے بہت بڑا کسان کارڈ پروجیکٹ لارہے ہیں ، پرائس کنٹرول کے لیے الگ سسٹم بنا رہے ہیں۔

دوسری طرف کھاد کی دستیابی سے متعلق اجلاس میں مریم نواز نے خبردار کیا کہ کھاد کی ذخیرہ اندوزی اور اسمگلنگ روکنے میں کوتاہی برداشت نہیں کریں گی۔

بریفنگ کے دوران بتایا گیا کہ پنجاب میں یوریا کھاد کی طلب اور پیداوار تقریباً 65 لاکھ ٹن ہے، یوریا کھاد کی ملکی پیداوار کا تقریباً 70 فیصد حصہ ربیع اور خریف کی فصلوں کے لیے پنجاب میں استعمال ہوتا ہے۔

مریم نواز نے کھاد کی قیمتوں میں کمی کے رجحان پر اطمینان کا اظہار کرتے ہوئے کھاد کی ذخیرہ اندوزی اور غیر قانونی نقل و حمل روکنے کے لیے سخت اور موثر اقدامات کو یقینی بنانے کا حکم دیا۔

اجلاس میں کسانوں کو کھاد کی دستیابی کو یقینی بنانے کے لیے شفاف طریقہ کار اپنانے کی ضرورت پر زور دیا گیا۔ وزیر اعلیٰ پنجاب نے پلانٹ سے ڈیلر تک کھاد کی سپلائی کی ڈیجیٹل سپلائی مانیٹرنگ کو موثر بنانے کی بھی ہدایت کی۔

وزیر اعلیٰ کی زیر صدارت اجلاس میں کیڑے مار ادویات اور کھاد ایکٹ میں ترامیم کی سفارشات پر غور کیا گیا اور کسان کارڈ پروگرام میں رجسٹریشن کے لیے خصوصی ہیلپ لائن قائم کرنے کا اصولی فیصلہ کیا گیا۔

اس موقع پر گفتگو کرتے ہوئے مریم نواز نے کہا کہ پنجاب کے کسانوں کو کھاد کی فراہمی ہر صورت یقینی بنائی جائے گی۔ کھاد کی ذخیرہ اندوزی اور اسمگلنگ روکنے میں غفلت ہر گز برداشت نہیں کی جائے گی، ہر کسان کے مفادات کا تحفظ کیا جائے گا۔ کسانوں کا استحصال کسی صورت قبول نہیں کیا جائے گا۔