یو ایچ ایس نے میڈیکل کالجوں کو طلبہ پر جرمانے عائد کرنے سے روک دیا

لاہور: یونیورسٹی آف ہیلتھ سائنسز نے میڈیکل کالجوں کو طلبہ پر ہر قسم کے جرمانے عائد کرنے سے روک دیا۔ کوئی بھی میڈیکل کالج اب یو ایچ ایس کی منظوری کے بغیر کسی بھی طالب علم کو جرمانہ نہیں کرسکے گا۔ تمام سرکاری اور نجی تمام میڈیکل کالجز یو ایچ ایس پالیسی کی پیروی کے پابند ہوں گے۔

جاری اعلامیہ میں کہا گیا کہ غیر حاضری پر طلبہ کو بھاری جرمانے نہیں کیے جاسکیں گے۔ ڈسپلن کو یقینی بنانے کیلئے میڈیکل اور ڈینٹل کالجوں میں سہ ماہی پیرنٹ-ٹیچر میٹنگ لازمی قرار دے دی گئی۔

یہ فیصلے یو ایچ ایس کی اکیڈمک کونسل کے 37ویں اجلاس میں کیے گئے جس کی صدارت وائس چانسلر پروفیسر احسن وحید راٹھور نے کی۔ اجلاس میں الحاق شدہ میڈیکل کالجز اور دیگر اداروں کے سربراہان نے شرکت کی۔

اپنے خطاب میں پروفیسر احسن وحید راٹھور نے کہا کہ کالجز سٹوڈنٹ کلرک پر انحصار ختم کریں۔ طلبہ کو عزت دیں اور ان کے مسائل کے حل کیلئے فیکلٹی کو استعمال کیا جائے۔ اکیڈمک کونسل میں فیصلہ کیا گیا کہ میڈیکل کالجز کے طلبہ کو سال میں 18 چھٹیوں کی اجازت ہوگی۔ زیادہ چھٹیوں کی صورت میں طلبہ کو اضافی کلاسز پڑھنا ہوں گی۔

اجلاس میں طلبہ کے نظم و ضبط، حاضریوں کے حوالے سے واضح پالیسیاں کالجز کے پراسپیکٹس کا حصہ بنانے کا فیصلہ بھی کیا گیا۔ وی سی یو ایچ ایس کا کہنا تھا کہ دیکھنے میں آیا ہے کہ بعض کالجز چھوٹی چھوٹی باتوں پر اپنے طلبہ کو بھاری جرمانے کررہے ہیں۔یہ جرمانے طلبہ پر نہیں بلکہ ان کے والدین پر بوجھ ہیں۔

انھوں نے ہدایت کی کہ یونیورسٹی کو مطلع کیے بغیر کسی بھی طالب علم کو سزا نہ دی جائے۔ ممبران نے فیصلہ کیا کہ یونیورسٹی کی منظوری کے بغیر کوئی بھی کالج کسی طالب علم کو معطل یا خارج نہیں کرسکتا۔ اس بات کی بھی منظوری دی گئی کہ پروگرام منجمد کروانے پر اس کا اطلاق امتحانات ہر نہیں ہوگا۔

سمسٹر فریز کروانے پر امتحانات منجمد نہیں ہوں گے اور امیدوار کے چانسز شمار کیے جائیں گے۔ اکیڈمک کونسل نے اس بات پر زور دیا کہ پرائیویٹ میڈیکل کالجز نادار طلبہ کیلئے سکالرشپ پالیسی لیکرآئیں۔ سلیکشن میں شفافیت کو یقینی بنانے کیلئے کالجز کی سکالرشپ کمیٹی میں یو ایچ ایس کا ایک ممبر بھی شامل ہوگا۔

وی سی یو ایچ ایس نے مزید کہا کہ پی ایم ڈی سی کی پالیسی کے مطابق تمام پرائیویٹ کالجز اپنے ہسپتالوں میں فری بیڈز مختص کرنے کے پابند ہیں۔ اس حوالے سے پرائیویٹ ٹیچنگ ہسپتال اپنے قریبی سرکاری ہسپتال کے ساتھ معاہدہ کریں گے۔ سرکاری ہسپتالوں میں مریضوں کا رش بڑھنے پر انھیں متعلقہ پرائیویٹ ٹیچنگ ہسپتال منتقل کیا جائے گا۔

 پروفیسر احسن وحید راٹھور نے بتایا کہ اس حوالے سے پنجاب حکومت پالیسی اور طریق کار وضع کررہی ہے۔ ممبران کو بتایا گیا کہ میڈیکل کے طلبہ کو مختلف تکنیکوں کی تربیت دینے کیلئے یو ایچ ایس سمر سکول شروع کیا جارہا ہے۔ یو ایچ ایس سمر سکول اسی سال موسم گرما کی چھٹیوں میں شروع کیا جارہا ہے۔

اجلاس میں فزیالوجی ڈیپارٹمنٹ کی سربراہ ڈاکٹر ہما سعید خان کو ایڈوانسڈ سٹڈیز اینڈ ریسرچ بورڈ کا نیا ممبر نامزد کرنے، ایم ایس ویٹرو ریٹینل آپتھلمالوجی کے نئے نصاب اور ایم ایس نیورو سرجری کے ترمیم شدہ نصاب اور ڈگری پروگراموں کی طرز پر سرٹیفکیٹ اور ڈپلومہ پروگرامز میں کم از کم 85 فیصد حاضری کی شرط لانے کی منظوری بھی دی گئی۔