وزیر صحت نے خسرہ وباء کے پھیلائو کا ذمہ دار پی ٹی آئی حکومت کو قرار دے دیا

صوبائی وزیر صحت نے کہا کہ خسرہ وباء کے پھیلائو کی ذمہ دار پی ٹی آئی کی حکومت ہے ، انہوں نے بچوں کی ویکسی نیشن پر توجہ نہیں دی۔

وزیر صحت پنجاب خواجہ عمران نذیر نے کہا کہ پنجاب حکومت صحت کی شعبے میں بہتری کے لیے اقدامات کررہی ہے اور صحت وتعلیم کے شعبے پر وزیراعلیٰ مریم نواز خصوصی توجہ دے رہی ہے، تاہم گزشتہ دور حکومت کے نقصانات آج ہم بھگت رہے ہیں۔

لاہور میں صوبائی وزرا خواجہ عمران نذیر اور خواجہ سلمان رفیق نے پنجاب میں خسرہ پھیلاؤ سے متعلق پریس کانفرنس کی۔

میڈیا سے گفتگو کرتے ہوئے انہوں نے کہا کہ اگر پی ٹی آئی کی حکومت نے توجہ دی ہوتی تو مسلم لیگ (ن) کو یہ سب کچھ نہیں بھگتنا پڑتا۔گزشتہ دورحکومت میں صحت کے شعبہ کو شدید نقصان پہنچایا گیا، پنجاب میں صحت کے لیے بہترین نظام کی ضرورت ہے۔

یاد رہے کہ چند روز قبل پنجاب میں پتوکی، شیخوپورہ اور کبیر والا میں خسرہ کے کیسز سامنے آئے تھے، جس کی وجہ سے 7 بچوں کی اموات ہوئی تھی ۔