امریکی سفیر کا پاکستانی کرکٹ ٹیم کے لئے نیک خواہشات کا اظہار

اسلام آباد: امریکی سفیر ڈونلڈ بلوم نے ٹی ٹوئنٹی ورلڈ کپ میں پاکستان ٹیم کے لیے نیک خواہشات کا اظہار کرتے ہوئے کہا ہے کہ پاکستان میں کرکٹ کا شوق رکھنے والوں کا جنون دیکھا ہے۔

ڈونلڈ بلوم نے ایک ویڈیو بیان میں کہا کہ پاکستان کرکٹ ٹیم کے ساتھ مختصر ملاقات کی جس میں کھلاڑیوں سے کرکٹ کے حوالے سے معلومات لیں۔

امریکی سفیرکاکہنا تھا کہ پاکستان اور امریکہ میں مشترکہ کرکٹ کے شوقین موجود ہیں۔ پاکستان میں گرمی کی شدت کے باوجود کھلاڑی گرائونڈ میں کرکٹ کھیلتے ہوئے نظر آتے ہیں۔

انہوں نے کہا کہ امریکا پہلی بار کرکٹ ورلڈکپ کی میزبانی کررہا ہے، جب کہ حال ہی میں ہم نے اسلام آباد میں پاکستان کرکٹ ٹیم کی میزبانی کی۔

علاوہ ازیں امریکا اور ویسٹ انڈیز میں آج سے ٹی20 ورلڈکپ کا آغاز ہونے جارہا ہے، افتتاحی میچ میں میزبان امریکا اور کینیڈا کی ٹیمیں مدمقابل ہوں گی، جبکہ پاکستانی ٹیم اپنا پہلا میچ میزبان امریکا کے خلاف 6 جون کو کھیلے گا۔