پاکستانی کرکٹ شائقین کے لئے ٹی ٹوینٹی ورلڈکپ پر نیا ترانہ جاری

ٹی ٹوینٹی ورلڈ کپ 2024 کی مناسبت سے پاکستان کرکٹ بورڈ نے "ساڈی واری اوئے" کے ٹائٹل سے پنجابی اور اردو زبان کی آمیزش سے ترانہ بنایا ہے۔

پاکستان کرکٹ بورڈ کے حالیہ جاری ترانے کو مایا ناز گلوکار عارف لوہار، علی عظمت اور نہال نسیم نےاپنی جادوئی آواز میں گایا ہے۔

پی سی بی کے اس نئے ترانے کے جاری ہونے کے محض دو گھنٹے بعد سوشل میڈیا پر اسے چار لاکھ  سے زائد لوگوں نے دیکھا اور اپنی بھر پور پسندیدگی کا اظہار کیا۔ 

ایک لمبے عرصے سے پاکستانی کرکٹ شائقین پی سی بی سے یہ تقاضہ کر رہے تھے کہ ہمارے ملک کی شائع شدہ چیزوں میں ہماری زبان اور ثقافت کی نمائندگی ہونی چاہیے ۔ ترانے کے اشعار میں اردو زبان کے ساتھ ساتھ پنجابی زبان کو شامل کرنے کو پاکستانی شائقین نے بھر پور سراہا۔  

الفاظ کے ترنم سے مسحور کرنے کے ساتھ ساتھ  پاکستان بمقابلہ نیوزی لینڈ کے مناظر اور پاکستانی کھلاڑیوں کی دلکش موجودگی نے ترانے کے لطف کو دو بالا کر دیا۔

پاکستانی شائقین نے حالیہ جاری کردہ کرکٹ  کے ترانے  پر اپنا اظہار کرتے ہوئے امید ظاہر کی کہ اس بار ورلڈ کپ اٹھانے کی باری ہماری ہی ہو گی۔