طبی تعلیم کے شعبے کو درپیش مسائل کے حل کیلئے کمیٹی تشکیل

نائب وزیراعظم اور وزیرخارجہ اسحاق ڈار نے کہا ہے کہ ملک میں طبی تعلیم کے شعبے کو درپیش مسائل کے حل کیلئے ایک کمیٹی تشکیل دیدی گئی ہے ۔

آج(ہفتہ) کو اسلام آباد میں ایچ بی ایس میڈیکل اینڈ ڈینٹل کالج کے پہلے کانووکیشن سے خطاب کرتے ہوئے انہوں نے کہا کمیٹی ملک میں طبی تعلیم میں طلب اور رسد کا جائزہ لے گی۔

نائب وزیراعظم نے کہا کہ حکومت ہرایک کیلئے طبی سہولیات کی فراہمی ارزاں اورقابل رسائی بنانے کی کوشش کررہی ہے ۔

انہوں نے کہا وزیراعظم شہبازشریف نے طبی تعلیم کی بہتری اور اساتذہ کی کمی پوری کرنے اورطبی ڈھانچے کو بہتر بنانے کیلئے اہم اقدامات کیئے ہیں۔

اسحاق ڈار نے کہا کہ ہم مشترکہ کوششوں کے ذریعے پاکستان کو ایک ترقی یافتہ اور خوشحال ملک بنا سکتے ہیں۔

انہوں نے کہا کہ حکومت نے معاشی بہتری کیلئے سخت اقدامات کئے۔

اسحاق ڈار نے اس اعتماد کا اظہار کیا کہ موجودہ حکومت قائداعظم محمد علی جناح اور علامہ اقبال کے تصورات کے مطابق پاکستان کو معاشی خوشحالی کے نئے درجے پر لے جائیگی۔

انہوں نے کہاکہ صورتحال تبدیل ہورہی ہے اور پاکستان اقوام عالم میں اب مزید تنہائی کا شکار نہیں ہے جیسا کہ بعض ناقدین دعوی کررہے تھے۔