ہمیں تعنہ دینے والوں نے جمہوریت کو نقصان پہنچایا، نواز شریف

صدر پاکستان مسلم لیگ (ن) میاں نواز شریف نے کہا کہ ہمیں تعنہ دینے والوں نے جمہوریت کو نقصان پہنچایا۔

سینیٹ میں پارلیمانی پارٹی کے ارکان سے گفتگو کرتے ہوئے انہوں نے کہا کہ انکوائری ضروری ہے کہ ملک کے ساتھ کس نے کیا کیا؟قوم کو بھی موازنہ کرنا چاہئے۔

سابق وزیراعظم کا کہنا تھا کہ شاہد خاقان عباسی عمدہ انسان ہیں ، انہوں نے بڑی بہادری اور جرات سے میرے ساتھ جیل کاٹی۔انہوں نے کبھی اُف تک نہیں کیا لیکن انہوں نے بہت بہادری کے ساتھ میرا ساتھ دیا اور مسائل بھی برداشت کیے، جو سچ بات ہے وہ کرنی اور کہنی چاہیے، مجھے وہ وقت یاد آتا ہے کہ ہم بھی متزلزل نہیں ہوئے، لیکن اللہ نے وہ وقت بھی نکلوادیا۔

انہوں نے کہا کہ پرویز مشرف اس دنیا سے چلے گئے ہیں اب میر ے دل میں ان کیلئے اب کوئی شکوہ یا گلہ نہیں لیکن میں صرف مشرف سے پوچھتا ہوں کہ کیا وجہ تھی کہ انہوں نے ایک اچھے بھلے وزیر اعظم کو اکھاڑ کے باہر پھینک دیا اور اسمبلیاں بھی توڑ دیں؟ عدلیہ ان کے گلے میں ہار پہنایا اور کہا کہ ہمیں آپ کا انتظار تھا، آپ کہاں تھے؟ اور پھر اس وزیر اعظم کو گرفتار کرلیا جس نے ایٹمی بٹن پر ہاتھ رکھ کے اسے دبایا تھا اور ایٹمی دھماکے کیے، یہ صلہ ملا اس وزیر اعظم کو۔

میاں نواز شریف نے کہاکہ میں بنی گالا میں ووٹ مانگنے یا مدد مانگنے نہیں گیا۔میں خود ان کے گھر چلا گیا آئو مل کر کام کریں۔ہم نے آئی ایم ایف کو خدا حافظ کہا یہ دوبارہ لے آئے۔میں انتہائی سستے ریٹ پر بجلی چھوڑ کر گیا تھا۔اب بجلی کی قیمتیں آسمان سے باتیں کر رہی ہیں۔

ان کا کہنا تھا کہ ہم نے اس موقع پر حکومت سنبھالی لیکن ہماری معیشت بہتر ہورہی ہے، ملک میں مہنگائی کم ہو رہی ہے ، اسٹاک مارکیٹ میں بھی بہتری آرہی ہے، میں اس کے لیے شہباز شریف کو شاباشی دوں گا، انہوں نے دن رات ایک کردیا ہے، میں مریم کو شاباش دون گا کیونکہ یہ بھی دن رات محنت کر رہی ہیں اور لوگوں سے گھل مل رہی ہیں۔

انہوں نے مزید کہا کہ مہنگائی کنٹرول کرنے کیلئے وزیراعلیٰ پنجاب مریم نواز نے اہم کردار ادا کیا۔اس حوالے سے دیگر منصوبے شروع کئے ہیں ، کسانوں کو ریلیف دیا جا رہا ہے۔ اس کے علاوہ وزیراعلیٰ پنجاب مریم نواز پنجاب کی عوام کے لئے دیگر منصوبے بھی جلد شروع کریں گی۔