کراچی میں آئندہ دنوں میں اربن فلڈنگ کا خدشہ 

سندھ حکومت نے مون سون کے باعث آئندہ دنوں میں اربن فلڈنگ کے خطرے کا الرٹ جاری کر دیا۔ 

تفصیلات کے مطابق آندہ دنوں میں مون سون کے باعث موسلادھار بارشوں کی توقع کی جا رہی ہے۔  اس کے ساتھ ہی موسمیاتی تبدیلیوں کی وجہ سے گلیشیئرزپگھلنے کے باعث دریاؤں میں بھی زیادہ پانی آنے کا امکان ہے۔ 
پی ڈ ی ایم اے کے الرٹ کے بعد کراچی کمشنر سید حسن نقوی کے زیر سربراہی اجلاس منعقد ہوا۔
 اجلاس کے دوران متعلقہ حکام نےشہر بھر کے نالوں کی صفائی پر زور دیا اور خدشہ ظاہر کیا کہ اگر نالوں میں نکاسی آب کو بہتر کرنے کے لیے کچرے کونہیں نکالا گیا، تو شہر بھر میں شدید اربن فلڈنگ کا خدشہ ہے۔  کمشنر سید حسن نقوی نے کراچی شہر کے حوالے سے آئندہ دنوں کی حکمت عملی پر جامع پلان بنانے کے لیے متعلقہ حکام سے تفصیلی بات چیت کی۔
گزشتہ ہفتے سندھ کے چیف سیکریٹری آصف حیدر شاہ نے بھی مون سون کی بارشوں کے حوالے سے اجلاس کی صدارت کرتے ہوئے متعلقہ اداروں کی رپورٹس کی بنیاد پر حالات کا جائزہ لیا اور متعلقہ اداروں کو تمام تر ضروری آلات و مشینری کا بندوبست کرنے کی ہدایات جاری کر دیں۔