فافن نے قومی اسمبلی کے  ابتدائی 100 دنوں کی کارکردگی پر رپورٹ جاری کر دی

فری اینڈ فیئر الیکشن نیٹ ورک (فافن) نے قومی اسمبلی کے  ابتدائی 100 دنوں کی کارکردگی پر رپورٹ جاری کر دی۔ 

فافن کی رپورٹ کے مطابق  قومی اسمبلی کے ابتدائی 100 دنوں میں قانون سازی کا عمل سست روی کا شکار رہا، قائمہ کمیٹیوں کی تشکیل میں تاخیر سے اسمبلی کی کارکردگی بھی متاثر ہوئی۔ سکیورٹی خدشات کی آڑ میں قومی اسمبلی کی گیلری تک شہریوں کی رسائی پر  پابندی بھی کارکردگی پر اثر انداز ہوئی۔

رپورٹ میں کہا گیا ہے کہ مجموعی طور پر ایوان نے 66 گھنٹے اور 33 منٹ پر محیط 23 اجلاس کیے، ہاؤس کے موجودہ 310 ممبران میں سے 159 (51 فیصد) ممبران نے فعال ہوکر اجلاسوں میں شرکت کی، ایوان میں ارکان کی اوسط حاضری 231 رہی جس میں سب سے زیادہ 302 اور سب سے کم 176 ہے۔ 

فافن کے مطابق وزیراعظم شہباز شریف نے قومی اسمبلی کے 23 میں سے صرف 2 اجلاسوں کی کارروائی میں شرکت کی جو کہ 10فیصد بنتا ہے، جبکہ ماضی میں سابق وزیر اعظم نواز شریف 26  فیصد اور عمران خان 29 فیصد اجلاسوں کا حصہ بنے۔

رپورٹ میں یہ بھی بتایا گیا کہ سپیکر قومی اسمبلی سردار ایاز صادق اور ڈپٹی سپیکر نے 82 فیصد کارروائی کی صدارت کی، اپوزیشن لیڈر عمر ایوب کی ایوان میں حاضری 88 فیصد رہی جب کہ صرف 29 ارکان اسمبلی نے 100 فیصد حاضری دی۔