گرمی کی شدت میں کمی کا امکان، محکمہ موسمیات نے بارشوں کی نوید سنا دی

پنجاب کے بیشتر علاقوں میں 20 سے 22 جون بارشوں کی پیش گوئی کی گئی ہے۔

محکمہ موسمیات کے مطابق کشمیر، خیبر پختونخوا،گلگت بلتستان ، پنجاب کے کئی شہروں میں مطلع آبرآلود رہے گا ، پنجاب کے کئی شہروں میں بھی آج بادل برسنے کا امکان ہے۔

محکمہ موسمیات کے مطابق راولپنڈی،مری،جہلم،گجرات،گوجرانوالہ،لاہور،سیالکوٹ سمیت دیگر شہروں میں بھی بارش کا امکان ہے۔ بحیرہ عرب کی نم ہوائیں ملک میں داخل ہونے کی وجہ سے 16 سے 22جون تک بارشوں کا سلسلہ شروع ہو گا، 20سے 22جون کو جنوبی پنجاب میں بارشوں کی پیشگوئی کر دی ۔

محکمہ موسمیات نے معمول سے زیادہ بارشیں ہونے کا امکان ظاہر کیا ہے۔ جاری کردہ مون سون آؤٹ لک رپورٹ کے مطابق ملک کے بیشتر علاقوں میں معمول سےزیادہ بارشیں ہونے کا خدشہ ظاہر کیا گیا ہے۔

بالائی پنجاب اورزیریں سندھ میں زیادہ بارشیں ہونے کی توقع ہے، بلوچستان میں معمول سے کچھ زیادہ بارشیں ہونے کا امکان ظاہر کیا گیا ہے۔

دوسری جانب ملک بھر میں گرمی کا راج برقرار ہے ، گزشتہ روز شمالی علاقہ جات اور کشمیر کے علاوہ پورہ ملک شدید گرمی کی لپیٹ میں ہے  ۔ محکمہ موسمیات کے مطابق زیادہ سے زیادہ درجہ حرارت 47ریکارڈ  کیا گیا ہے ،  سندھ کے میدانی علاقوں اور جنوبی پنجاب میں گرمی کی شدت آج بھی برقرار ہے ۔

ملک کے بعض شہر گزشتہ روز شدید گرمی کی لپیٹ میں رہے۔جس میں سندھ ،جنوبی پنجاب اور بلوچستان کے کئی اضلاع میں 47 ڈگری سینٹی گریڈ ریکارڈ کیا گیا۔ محکمہ موسمیات کا کہنا ہے کہ آئندہ کچھ روز بھی سندھ کے میدانی علاقے شدید گرمی کی لپیٹ میں رہیں گے جبکہ لاڑکانہ ،دادو، جیکب آباد ، نواب شاہ میں بھی سورج آج اپنے جوبن پر رہے گا۔