سکیورٹی پلان پر کسی قسم کی غفلت کی کوئی گنجائش نہیں، محسن نقوی

وفاقی وزیر داخلہ محسن نقوی نے کہا کہ سکیورٹی پلان پر کسی قسم کی غفلت کی کوئی گنجائش نہیں۔ملک دشمن عناصر کے مذموم عزائم خاک میں ملانے کے لئے متعلقہ ادارے قریبی رابطہ رکھیں۔

وفاقی وزیر داخلہ محسن نقوی کی زیر صدارت اجلاس ہواجس میں چینی شہریوں کی حفاظت کیلئے کیے جانے والے اقدامات کا جائزہ لیا گیا۔

اجلاس میں ملک میں سکیورٹی کی مجموعی صورتحال پر بھی غور کیا گیا۔ وفاقی وزیر داخلہ محسن نقوی نے سکیورٹی پلان کے ایس او پیز پر من و عن عملدرآمد کی ہدایت کرتے ہوئے کہا کہ وضع کردہ پلان کی ہر سطح پر باقاعدہ مانیٹرنگ کی جائے۔

وزارت داخلہ میں منعقدہ اجلاس میں متعلقہ اداروں کی جانب سے سکیورٹی پلان اور مجموعی صورتحال پر بریفنگ دی گئی، جس میں وفاقی سیکرٹری داخلہ، سربراہ نیشنل کاؤنٹر ٹیررازم اتھارٹی (نیکٹ)، کوآرڈینیٹر نیشنل ایکشن پلان نے بھی شرکت کی۔