مریم نواز کی عید پر بہترین انتظامات کرنےوالے افسران کو شاباش

لاہور: وزیراعلیٰ پنجاب مریم نواز نے عیدا لاضحی پر عمدہ کارکردگی دکھانے والے افسران کو شاباش دے دی۔

وزیراعلیٰ پنجاب مریم نواز کی زیر صدارت اہم اجلاس منعقد ہوا جس میں انہوں نے پنجاب میں عید الاضحی کے موقع پر دیگر انتظامی امورکے حوالے سے مختلف اداروں کی ٹیم کے کاموں کو سراہا اور ان کی تعریف کی۔

مریم نوا ز کی زیر صدارت اجلاس میں عیدالاضحی کے موقع پر انتظامی امور سے متعلق مجموعی پرفارمنس کا جائزہ لیاگیا۔ اس موقع پر وزیراعلیٰ پنجاب مریم نواز نے کہا کہ میں اپنی پوری ٹیم سے خوش ہوں جس طرح انہوں نے عید کے موقع پر اپنے فرائض سر انجام دیئے۔

مریم نواز نے چیف سیکرٹری پنجاب اور دیگر ڈپٹی کمشنرز کی تعریف کرتے ہوئے ان کے کاموں کو سراہا۔

مریم نواز کا کہنا تھا کہ عوام کی خدمت کا سفر اسی طرح جاری رہنا چاہئے، جس طرح عید الاضحی پر تمام ٹیموں نے مل کر کام کیا اسی طرح عام دنوں میں بھی کام کیا جائے۔

اجلاس میں وزیراعلیٰ پنجاب مریم نواز کو ہسپتالوں اور سکولوں کے دورے کے حوالے سے بھی رپورٹ پیش کی گئی۔ اجلاس میں وزیر اطلاعات پنجاب عظمیٰ بخاری ، چیف سیکرٹری پنجاب، ڈپٹی کمشنرز سمیت دیگر اعلیٰ افسران نے شرکت کی۔