وزیراعظم آزاد کشمیر کا بجٹ گرانٹ میں اضافے کا مطالبہ

وفاقی وزیر بین الصوبائی رابطہ رانا ثناء اللہ نے وزیراعظم آزاد جموں و کشمیر چوہدری انوار الحق سے ملاقات کی جس میں کشمیر کے لیے بجٹ گرانٹ میں اضافے کا مطالبہ کیا گیا۔

ملاقات کے دوران آئندہ بجٹ اور آزاد جموں وکشمیر کی ترقیاتی کاموں سے متعلق امور پر تبادلہ خیال کیا گیا ہے۔

چوہدری انور نے کہا کہ حکومت کا بنیادی مقصد گڈ گورنس اور عوام کی فلاح و بہبود کو یقینی بنانا ہے، آزاد جموں و کشمیر کے بجٹ گرانٹ میں گزشتہ پانچ سالوں سے کوئی اضافہ نہیں کیا گیا۔ سالانہ ترقیاتی منصوبوں کے ہدف کو پورا کرنے کے لیے اس میں اضافہ کیا جائے۔

گفتگو کرتے ہوئے چوہدری انوار الحق نے مزید کہا کہ سالانہ ترقیاتی منصوبوں کا ہدف پورا کرنے کیلئے  بجٹ گرانٹ میں اضافہ کیا جائے، موجودہ سیاسی و سکیورٹی صورتحال کو مد نظر رکھتے ہوئے آزاد جموں کشمیر کیلئے بجٹ گرانٹ میں اضافہ کیا جائے ۔

رانا ثنا ءاللہ نے کہا کہ بجٹ گرانٹ میں اضافے کی تجویز پر مثبت غور کیا جائے گا، حکومت آزاد جموں وکشمیر کی معاشی ترقی اور سماجی خوشحالی کیلئے دستیاب وسائل بروے کار لائے گی ۔آزاد جموں کشمیر کی عوام کو ریلیف دینے کیلئے ضرور تعاون کریں گے اوروفاقی حکومت کشمیر کی حمایت جاری رکھے گی ۔