دباؤکے باوجود بجلی کی قیمتیں نہیں بڑھائیں : شاہ محمود قریشی

تفصیلات کے مطابق وزیرخارجہ شاہ محمود قریشی  نے ملتان میں پریس کانفرنس کرتے ہوئے کہاکہ بجٹ پر اپوزیشن اپنا نقطہ نظر پیش کرے ، ہم ضرور سنیں گے ، پنجاب کے بجٹ میں جنوبی پنجاب کا علیحدہ بجٹ رکھا جائے گا ،  ضلع ملتان کیلئے ترقیاتی پیکج دیا گیا ہے ،   رواں ماہ کے آخری ہفتہ ملتان کی انتظامیہ کیساتھ میٹنگ کروں گا۔ روپیہ ، اسٹاک مارکیٹ اور سرمایہ میں استحکام آیا ہے ،اس بجٹ میں ہمارا فوکس اکنامک گروتھ ہے ،12ایکڑ سے کم کے کاشتکار کیلئے بلاسود قرضہ دینے کا فیصلہ کیا ہے ،اکنامک گروتھ سے غربت اور بےروزگاری کے مسائل حل ہوں گے ،زراعت اور انڈسٹریز کیلئے مراعات دی ہیں ،حکومت کی توجہ معاشی گروتھ پر ہے، 4فیصد گروتھ کی توقع کر رہے ہیں ۔

  انہوں نے کہاکہ  کورونا چیلنجز کے باوجود ریکوری ہورہی ہے ،گندم کی ریکارڈ پیداوار ہوئی ہے ،مکئی ، گنے اور چاول کی پیداوار میں بھی بے پناہ کامیابی ہوئی ہے ،کپاس میں ہمیں دقت  آئی جس کی وجہ سے اپنا ٹارگٹ پورا نہ کر سکے۔ شاہ محمود قریشی نے کہاکہ  ہم پر بہت پریشر تھا کہ بجلی کے نرخ اور ٹیرف بڑھایا جائے ،وزیر اعظم نے بہت گفت  وشنید کے بعد فیصلہ کیا کہ عوام پر بوجھ نہیں ڈالا جائے گا بجلی کی قیمتیں نہیں بڑھائی ،ہم نے پٹرولیم کی قیمتوں کو مستحکم رکھا ہے اور ڈیزل کی قیمتوں کو کم کرنے کا فیصلہ کیا۔

وزیرخارجہ نے کہاکہ وفاقی بجٹ میں صنعتی شعبے کو خصوصی مراعات دی گئی ہیں ،زراعت کی ترقی کیلئے چین سے مدد لیں گے ، ملکی تاریخ میں پہلی بات ترسیلات زر 29 ارب کو چھوئی ہیں ، زراعت کا شعبہ منفی سے مثبت اعشاریے میں آچکا ہے ،ہماری پر کیپٹا انکم میں بھی اضافہ دکھائی دے رہا ہے ،ہم نے قیمتوں میں ٹھہراؤ لانا ہے ،یوٹیلیٹی سٹورز کو زیادہ موثر طریقے سے استعمال کرنا ہے ۔

انہوں نے کہا کہ ہم نے انکم ٹیکس اور سیلز ٹیکس کی شرح میں اضافہ نہیں کیا ، ہمارا روپیہ جو دن بہ دن  گر رہا تھا اس میں ٹھہراؤ اور بہتری آئی ہے ، انڈسٹریل سیکٹر ترقی کرے گا ،  ہم اپنے روڈ انفراسٹکچر میں بہتری لا رہے ہیں ،ملتان تا سکھر موٹروے بن گئی ہے ، سکھر سے حیدرآباد کیلئے ہم نے رقم اس بجٹ میں مختص کی ہے ، یہ ٹکڑا مکمل ہونے سے پشاور سے کراچی تک موٹروے مکمل ہو جائے گی۔وزیرخارجہ نے مزید کہاکہ سیالکوٹ سے کھاریاں موٹروے کیلئے رقم مختص کی گئی ہے ، کراچی سندھ کا دارالخلافہ ہے ،کراچی سرکلر ریلوے کیلئے بجٹ میں رقم مختص کی گئی ہے ، کراچی کیلئے ایک خاص پیکج رکھا ہے ، پانی کےصوبوں کیلئے وفاقی بجٹ سے 91 ارب روپے مختص کیا گیا ہے۔