پی ٹی آئی کو اسلام آباد میں جلسے کی اجازت مل گئی، این او سی جاری

اسلام آباد کی ضلعی انتظامیہ نے پی ٹی آئی کو اسلام آباد میں جلسہ کرنے کی اجازت دے دی۔

میڈیا رپورٹ کے مطابق اسلام آباد ہائیکورٹ کے جسٹس بابر ستار نے کیس کی سماعت کی۔دوران سماعت سرکاری وکیل نے عدالت کو پی ٹی آئی کو ترنول چوک کے پاس جلسہ کرنے کی اجازت دینے کے حوالے سے آگاہ کر دیا۔

این او سی جاری ہونے پر اسلام آباد ہائیکورٹ نے پی ٹی آئی رہنما عامر مسعود مغل کی درخواست نمٹا دی۔

وکیل درخواستگزار شعیب شاہین نے کہا کہ 26 جون کو عدالتی حکم پر درخواست گزار کی ڈپٹی کمشنر سے ملاقات ہوئی، ڈپٹی کمشنر نے این او سی جاری کرنے کا کہا، 26 جون سے کل تک ڈپٹی کمشنر سے 20 دفعہ رابطہ کیا گیا۔

جسٹس بابر ستار نے پی ٹی آئی وکیل سے استفسار کیا کہ ضلعی انتظامیہ نے آپ کو جلسے کی اجازت تو دے دی ہے، ہر بات پر جھگڑا تو نہیں کر سکتے۔

وکیل نے جواب دیا کہ ہمیں این او سی نہیں دیا گیا بلکہ آج ایک دن پہلے عدالت کو آگاہ کیا گیا ہے، ہمیں جلسے کی تیاری کے لیے وقت ہی نہیں دیا گیا۔

اس پر جسٹس بابر ستار نے ریمارکس دیے کہ چلیں آپ تو بڑی پارٹی ہیں، کچھ گھنٹوں میں ہی لوگوں کو نکال لیں گے، آپ کیا کہتے ہیں ڈپٹی کمشنر اب لوگوں کو بھی نکال کر لائے؟

بعد ازاں عدالت نے این او سی جاری کرنے پر درخواست نمٹادی۔

یاد رہے کہ گزشتہ روز رہنما پی ٹی آئی عمر ایوب نے کہا تھا کہ 6 جولائی کو اسلام آباد میں تاریخی جلسہ کریں گے۔