عمران خان نے اگر بھوک ہڑتال کی تو پوری قیادت ان کا ساتھ دے گی، علی محمد خان

پی ٹی آئی کے رہنما علی محمد خان نے کہا کہ اگر عمران خان نے بھوک ہڑتال کی تو ہم بھی ملک گیربھوک ہڑتال اور پرامن احتجاجی مظاہرے کریں گے۔

اڈیالہ جیل کے باہر میڈیا سے گفتگو میں علی محمد خان کا کہنا تھا کہ عمران خان نے عندیہ دیا ہے کہ اگر ان کے معاملات کو آئین اور قانون کے مطابق نہیں چلایا جاتا تو وہ وکلاء اور پارٹی کی سینئر لیڈر شپ سے مشورہ کرکے بھوک ہڑتال پر جائیں گے۔اللہ وہ وقت نہ لائے لیکن اگر عمران خان بھوک ہڑتال پر گئے تو پورے پاکستان میں بھوک ہڑتالی کیمپ اور پر امن احتجاج کئے جائیں گے۔

علی محمد خان نے مزید کہا کہ کیوں یہ نوبت لائی جا رہی ہے، کیوں ہمارے لیڈر کو انصاف نہیں مل رہا۔ بانی پی ٹی آئی کا بھوک ہڑتال کرنے کا کہنا ثابت کرتا ہے کہ اگر نوبت یہاں تک آ گئی ہے تو اس کی وجہ بانی پی ٹی آئی کو انصاف نہ ملنا ہے۔ان تمام معاملات کا سیاسی حل نکلنا ضروری تھا۔

انہوں نے کہا کہ  آج بانی پی ٹی آئی  نے یہ بات بھی کی کہ حقیقی جمہوریت کے لیے عوام کے مینڈیٹ کا تحفظ ضروری ہے، ہمیں ہمارا مینڈیٹ واپس چاہیئے نہیں تو پھر صاف شفاف الیکشن کی طرف جانا پڑے گا۔ ملک میں جمہوریت نہیں تو پھر اس نظام کا کیا فائدہ، انہوں نے آج پھر یہ بات کی ہے کہ وہ کسی بھی صورت نہیں جھکیں گے۔

پی ٹی آئی رہنما کا مزید کہنا تھا کہ کل اسلام آباد کے جلسے کے متعلق بانی پی ٹی ائی نے عوام کو پیغام دیا کہ میں ان سے کبھی کمپرومائز نہیں کروں گا حقیقی آزادی کے لیے میری جدوجہد جاری رہے گی۔ ہزارہ میں بھی جلسہ ہے بانی پی ٹی ائی نے ہزارہ والوں کے لیئے پیغام بھیجا ہے کہ میری عوام کو کہنا وقت کے یزیدوں کے سامنے کبھی نہیں جھکوں گا غلامی سے موت بہتر ہے۔

ممبر قومی اسمبلی نے کہا کہ اڈیالہ جیل میں میڈیا سے گفتگو کرتے ہوئے بانی چیئرمین نے اس تاثر کو رد کر دیا کہ پی ٹی آئی میں نہ تو کوئی گروپ ہے اور نہ ہی کوئی بلاک ہے ، جن ممبران کو کچھ تحفظات تھے ان میں سے ایک دو ممبران آج ان سے ملیں ہیں اور کچھ اگلے ہفتے ملیں گے، تحریک انصاف میں ہر کسی کو اپنے رائے دینے کی آزادی ہے، یہ ن لیگ یا پیپلز پارٹی یا جے یو آئی ف نہیں ہے جہاں ایک ہی خاندان کی حکمرانی ہے۔