پی ٹی آئی کے آج ہونیوالے جلسے کا این او سی معطل

اسلام آباد انتظامیہ نے پی ٹی آئی کے آج ہونے والے جلسے کا این او سی معطل کردیا۔

میڈیا رپورٹ کے مطابق اسلام آباد انتظامیہ کے ترجمان نے بتایا کہ سکیورٹی صورتحال اور محرم الحرام کے باعث این او سی معطل کیا گیا ہے۔

انہوں نے واضح کیا کہ این او سی کی معطلی کا فیصلہ شہریوں کے جان و مال کے تحفظ کے لیے کیا گیا ہے۔

چیف کمشنر اسلام آباد کی زیر صدارت محرم الحرام کے حوالے سے اجلاس ہوا، اجلاس میں سکیورٹی خدشات کی صورتحال کا جائزہ لیا گیا، ایک سیاسی جماعت دعوت کے باوجود اجلاس میں شریک نہ ہوئی، اجلاس میں جلسے سے متعلق درخواستوں کا بھی جائزہ لیا گیا۔

اجلاس میں ڈپٹی کمشنر کی طرف سے دی جانے والی جلسے کی اجازت کا موجودہ سکیورٹی خدشات کے تناظر میں از سر نو جائزہ لیا گیا۔

چیف کمشنر اسلام آباد نے درخواستوں، موجودہ صورت حال، محرم الحرام کی آمد، سکیورٹی خدشات اور قانون نافذ کرنے والے اداروں کی سفارشات کی روشنی میں ڈپٹی کمشنر کی طرف سے جلسے کا این او سی معطل کرنے کا فیصلہ کیا۔

اسلام آباد انتظامیہ کی جانب سے کہا گیا کہ جلسے کے این او سی کی معطلی کا فیصلہ شہریوں کے جان و مال کے تحفظ کے لئے کیا گیا ہے، اسلام اباد میں امن عامہ کو برقرار رکھنا اور شہریوں کے جان و مال کا تحفظ ہماری ترجیح ہے۔

یاد رہے کہ دو روز قبل رہنما پاکستان تحریک انصاف اور قومی اسمبلی میں قائد حزب اختلاف عمر ایوب نے کہا تھا کہ 6 جولائی کو اسلام آباد میں تاریخی جلسہ کریں گے۔