وزیراعظم ہاوس اور آفس کے اخراجات کے تازہ اعدادوشمار جاری

تفصیلات کے مطابق  وزیراعظم عمران خان کی جانب سے کفایت شعاری کی روایت برقرار ہے،‏وزیراعظم کے 3 سالوں میں وزیراعظم آفس اور ہاؤس کے اخراجات میں 108 کروڑ روپے کی بچت کی گئی ہے۔وفاقی وزیر مراد سعید نے وزیراعظم ہاوس اور آفس کے اخراجات کے تازہ اعدادوشمار جاری کر دیے ہیں ۔

3 مالی سالوں میں وزیراعظم آفس کے لیے مختص بجٹ اور اخراجات میں 518ملین روپے کی بچت  کی گئی۔وزیراعظم ہاوس کے لیے مختص بجٹ اور اخراجات میں  565 ملین روپے کی بچت کی گئی۔ وزیراعظم نے 3 سالوں میں اپنے صوابدیدی فنڈز سے 1 روپے کا بھی استعمال نہیں کیا۔وزیراعظم کا کوئی کیمپ آفس نہ ہونے کے باعث 3 سالوں میں کیمپ آفس اخراجات صفر ہیں۔

وفاقی وزیر مراد سعید کا کہنا ہے کہ  مسلسل تیسرے سال وزیراعظم آفس کے اخراجات میں کروڑوں روپے کی کمی مثالی اقدام ہے، سابق سربراہان نے وزیراعظم آفس کے صوابدیدی فنڈز کو پانی کی طرح بہایا،صرف گفٹس، ٹپس اور تحائف کی صورت میں قومی خزانے سے کروڑوں روپے لٹائے گئے۔

مراد سعید کا کہنا تھا کہ  وزیراعظم عمران خان نے اقتدار سنبھالتے ہی صوابدیدی اختیارات ختم کر دئیے ہیں ، عوام کا پیسہ صرف عوام پر خرچ ہوگا، سرکاری عیاشیوں کیلئے نہیں، کیمپ آفسز، سکیورٹی اور غیر ملکی دوروں کے نام پر قومی خزانہ لوٹنے کی روایت ہمیشہ کیلئے ختم کر دی۔