اسرائیلی فوج نے غزہ پر وحشیانہ حملے تیز ، ایک ہی دن میں 64 سے زائد فلسطینی شہید

اسرائیلی فوج نے غزہ پر وحشیانہ حملے تیز کر دیئے، ایک ہی دن میں 64 سے زائد فلسطینی شہید اور 100 سے زائد زخمی ہو گئے۔

غیر ملکی خبر رساں اداروں کی ایک رپورٹ میں غزہ کی وزارت صحت نے کہا کہ بہت سے متاثرین اب بھی ملبے تلے دبے ہوئے ہیں۔ سول ڈیفنس کے اہلکار ان تک پہنچنے سے قاصر ہیں، 7 اکتوبر 2023 سے اب تک کم از کم 38 ہزار 983 فلسطینی شہید ہو چکے ہیں جن میں زیادہ تر خواتین اور بچے شامل ہیں، جب کہ زخمیوں کی تعداد 89 ہزار 727 سے تجاوز کر چکی ہے۔

حالیہ دنوں میں اسرائیلی فوج نے نصرت پناہ گزین کیمپوں کو نشانہ بنایا ہے۔ بے گھر ہونے والے غزہ کے رہائشی تیمور ابرکان، جو دیر البلاح میں ہیں، نے کہا، "ہم نے نصرت کیمپ میں دھماکوں کی آوازیں سنی اور دیر البلاح میں یہاں سے دھواں اٹھتے دیکھا"۔ ہمیں ڈرایا جا رہا ہے کہ یہاں بھی ٹینک آ کر تباہی کر سکتے ہیں۔

انہوں نے سوال اٹھایا کہ اب وہ کہاں جائیں؟ پورا غزہ آگ کی لپیٹ میں ہے اور انہیں جنگل میں ہرنوں کی طرح شکار کیا جا رہا ہے، جنگ کب ختم ہوگی؟

اسرائیلی فورسز نے غزہ کے جنوبی شہر رفح میں بھی اپنی جارحیت جاری رکھتے ہوئے ساحلی پٹی کے وسط میں ان علاقوں پر حملہ کیا جہاں ہزاروں بے گھر فلسطینی پناہ کی تلاش میں ہیں۔