نواز شریف اور آصف زرداری تاریخ کی سب سے بڑی غلطی کرنے جا رہے ہیں، فواد چوہدری

سابق وفاقی وزیر فواد چوہدری کا کہنا ہے جو لوگ باہر بیٹھ کر فوج اور عوام کو لڑوانا چاہتے ہیں ان سے سب دور رہیں، آصف علی زرداری اور نواز شریف تاریخ کی غلط سائیڈ پر ہیں جو ان کا ساتھ دے گا وہ تاریخ سے نظر نہیں ملا سکے گا۔ نہ عدالتوں کے فیصلے مانے جا رہے ہیں اور نہ ہی عوامی مینڈیٹ کو تسلیم کیا جا رہا ہے۔

لاہور میں میڈیا سے گفتگو کرتے ہوئے فواد چوہدری کا کہنا تھا پاکستان تحریک انصاف پر پابندی سے متعلق نواز شریف اور آصف زرداری تاریخ کی سب سے بڑی غلطی کرنے جا رہے ہیں، وہ خواہشات پر مبنی یہ فیصلے تو کر رہے ہیں لیکن ان کا ساتھ دینے والے تاریخ سے نظریں نہیں ملا سکے گے۔

فواد چوہدری کا کہنا تھا آپ نے بانی پی ٹی آئی کو 14 ماہ سے جیل میں رکھا ہوا ہے، کیا فرق پڑا، بلےکا نشان چھینا، کیسے کیسے نشانات دیے، پھر بھی لوگوں نے ووٹ دیے۔جسے ڈیجیٹل دہشتگردی کہہ رہے ہیں یہ پی ٹی آئی کی طرف سے نہیں ہو رہی ہے، ڈیجیٹل دہشت گردی پی ٹی آئی نہیں کر رہی بیرون ملک سے ہو رہی ہے۔

انہوں نے کہا کہ آپ نہ سپریم کورٹ کو مان رہے ہیں نہ ہی کسی قانون کو، رؤف حسن اور احمد کو فوری رہا کیا جائے، عدالت کے ساتھ لڑائی، عوام کے ساتھ لڑائی اور معیشت تباہ ہے، ابھی شروعات ہیں لیکن آنے والے دنوں میں لوگ چیخیں گے۔  انسداد دہشتگردی عدالت کے معزز جج پر عدم اعتماد ہے، دنیا پاکستان میں انسانی حقوق کی خلاف ورزیاں دیکھ رہی ہے۔

سابق وفاقی وزیر کا کہنا تھا کالعدم تحریک طالبان پاکستان (ٹی ٹی پی) سمیت دیگر جماعتوں کی کسی صورت حوصلہ افزائی نہیں ہونی چاہیے