ضلع کرم میں قبائلی تصادم: 20 افراد زخمی

کرم: ضلع کرم کے علاقے بوشہر اور مالی خیل میں دو قبائل کے درمیان زمین کے تنازع پر فائرنگ کا واقعہ پیش آیا ہے جس کے نتیجے میں 20 افراد زخمی ہو گئے ہیں۔

پولیس کے مطابق فریقین نے خودکار ہتھیاروں کا استعمال کیا اور ایک گروہ نے راکٹ حملہ بھی کیا جس میں ایک باپ اور اس کا بیٹا زخمی ہو گئے۔ زخمیوں کو فوری طور پر قریبی ہسپتال منتقل کر دیا گیا ہے۔

ڈپٹی کمشنر جاوید اللہ نے اس واقعے کی شدید مذمت کرتے ہوئے کہا ہے کہ انتظامیہ فائر بندی کے لیے کوششیں جاری رکھے ہوئے ہے۔ انہوں نے فریقین کے عمائدین سے اپیل کی ہے کہ وہ امن قائم کرنے میں اپنا کردار ادا کریں۔