سی ٹی ڈی کی کامیاب کارروائیاں، دہشتگردی کا بڑا منصوبہ ناکام

لاہور:پنجاب میں کاؤنٹر ٹیررازم ڈیپارٹمنٹ (سی ٹی ڈی) نے پنجاب کے مختلف علاقوں میں کارروائیوں کے دوران کالعدم تنظیموں سے تعلق رکھنے والے 3 دہشت گردوں کو گرفتار کر کے دہشت گردی کا بڑا منصوبہ ناکام بنا دیا۔

 ترجمان کے مطابق سی ٹی ڈی پنجاب نے دہشت گردی کے کسی بھی ناخوشگوار واقعے سے موثر انداز میں نمٹنے کے لیے صوبے کے مختلف اضلاع میں انٹیلی جنس پر مبنی 78 کارروائیاں کیں، جن میں 79 مشتبہ افراد سے پوچھ گچھ کی گئی اور 3 دہشت گردوں کو اسلحہ، دھماکہ خیز مواد اور دیگر ممنوعہ مواد سمیت گرفتار کیا گیا۔  گرفتار  دہشت گردوں میں عبدالوہاب، سیف اللہ اور خرم عباس شامل ہیں۔

انہوں نے کہا کہ ان کا تعلق کالعدم تنظیموں لشکر جھنگوی، داعش اور سپاہ محمد سے ہے۔  ان کا کہنا تھا کہ ان دہشت گردوں کی گرفتاری چکوال، فیصل آباد اور خوشاب میں انٹیلی جنس بیسڈ آپریشنز کے دوران عمل میں لائی گئی۔

انہوں نے بتایا کہ دہشت گردوں کے قبضے سے بارودی مواد 1625 گرام، دستی بم 03، آئی ای ڈی بم 02، ڈیٹونیٹر 3، سیفٹی فیوز وائر 8 فٹ، پمفلٹ 12، اسٹیکرز 10، اور 22250 روپے نقدی برآمد ہوئی ہے۔

ترجمان نے بتایا کہ گرفتار دہشت گردوں نے صوبے بھر میں تخریب کاری کا منصوبہ بنایا تھا اور وہ اہم تنصیبات کو نشانہ بنانا چاہتے تھے۔  انہوں نے مزید کہا کہ پولیس نے دہشت گردوں کے خلاف 3 مقدمات درج کر کے انہیں نامعلوم مقام پر منتقل کر دیا ہے۔

ان کا مزید کہنا تھا کہ رواں ہفتے کے دوران مقامی پولیس اور سیکیورٹی اداروں کے تعاون سے 952 کومبنگ آپریشنز بھی کیے گئے، ان آپریشنز کے دوران 32065 افراد کو چیک کیا گیا، 506 مشتبہ افراد کو گرفتار کیا گیا، 192 ایف آئی آر درج کی گئیں اور 173 بازیابیاں کی گئیں۔

کاؤنٹر ٹیررازم ڈیپارٹمنٹ پنجاب مستعدی سے محفوظ پنجاب کے اپنے ہدف پر عمل پیرا ہے اور دہشت گردوں اور ریاست دشمن عناصر کو سلاخوں کے پیچھے پہنچانے کی کوششوں میں کوئی کسر نہیں چھوڑی جائے گی، انہوں نے کہا کہ کسی بھی متعلقہ معلومات کی صورت میں ہیلپ لائن پر کال کریں۔